Ministériu Justisa liu hosi Diresaun Nasional Direitus Umanus no Cidadania - DNDHC komemora loron Direitus Umanus 10 Dezembru iha Postu Administrativu Fatuberliu, iha atividade lubuk ida maka hala’o hahu hosi loron 7-10 Dezembru 2015.

Loron refere hanesan loron ida ne’ebé istoriku no global selebra hosi nasaun sira iha mundu hanesan fo valor as ba vida umanu hodi reforsa dignidade ema hotu nian. Tuir Diretor interinu DNDHC, Vasco Soares iha nia diskursu wainhira hahu sesaun sira katak “objetivu selebrasaun ne’e hanesan respeitu ida hodi kontribui ba implementasaun prinsipiu deklarasaun universal direitus umanus, atividade lubuk ida maka ita hala’o da-dauk ne’e laos tan hodi fo valor ne’e deit maibe iha parte seluk fó hanoin mai ita hotu oinsa hatene direitus umanus no tau iha pratika moris sosiál iha mundu

Alende ne’e tuir Diretor Jeral Centro Formasaun Judisiariu ne’ebé reprezenta Ministru Justisa, Marcelina Tilman iha nia diskursu hatete “Direitus umanus katak direitu fundamental hodi proteze dignidade umanu univesalmente, deklarasaun ida ne’e mosu tamba iha funu entre nasaun sira iha pasadu hamosu funu mundial permeiru no segundu, atitude hirak ne’e implika ema barak terus no laiha respeitu ba vida umanu. Ho nune’e, nasaun sira balun koko hamutuk hamosu Deklarasaun Universal Direitus Umanus iha 10 Dezembru tinan 1948, nudar estadu direitu demokratiku ita iha obrigasaun promove, respeitu no realiza direitus umanus iha Timor-Leste.”

Administrador Postu Fatuberliu, Adriano Colaço iha nia intervensaun hatete katak “Hau no komunidade Fatuberliu sente kontente tamba selebrasaun loron importante direitus umanus ne’ebé monu iha loron 10 Dezembru ne’e hala’o iha ami nia teritoriu no foin dahuluk hala’o iha nivel Postu Administrativu, orgullu ida mós ekipa nasional Ministériu Justisa mai ho atividade oi-oin oinsa reforsa qualidade no quantidade informasaun ba asuntu direitus umanus.”

Oinsa atu anima komunidade iha area refere ba asuntu direitus umanus, iha atividade lubuk ida interligadu maka hala’o hanesan sertame, semináriu, jogus infantil, konsertu muzika no diskursu públiku. Hosi atividade hirak ne’e kona-ba sertame, jogus infantil no diskursu públiku iha kompetisaun ne’ebé di’ak tebes hamosu manan nain sira.
Ba manan nain Permeiru(I), Segundu (II) no Terseiru (III) ba atividade sertame no diskursu publiku hetan prezenti Piala inklui osan (Manan nain sira I, ho osan USD 100.00, manan nain II ho osan USD 75.00 no manan nain III ho osan USD 50.00). Ba manan nain Permeiru I-III ba atividade jogus infantil hetan kado ne’ebé falun espesial ba sira.

Atividade hirak ne’e asiste hosi estudante, profesor/a, komunidade, lideransa komunitaria nivel Aldeia, Postu, Munisipiu, PNTL, F-FDTL inklui ekipa DNDHC no membru Ministériu Justisa sira.

Carmelindo da Silva Caetano
Tekniku Superior, Divulgasaun, DNDHC/MJ