Dili,- Iha semana ida nia laran (14-22 Dezembru 2015) ekipa jurista ida husi Ministeriu Justisa Japaun nian, liu husi Diresaun International Cooperation Department (ICD) mai halo estudu komparativu konaba lei mediasaun nian iha Timor Leste. Ekipa ne’e mai servisu hamutuk ho ekipa Diresaun Nasional Asesoria Juridika no Lejislasaun (DNJAL) iha Ministeriu Justisa Timor Leste.

Alemde halo programa hanesan workshop hodi diskuti konaba proposta lei mediasaun nian nomos vizita ba instituisaun relevante sira iha Timor Leste, ekipa ida ne’e halo mos vizita ba Suco Lau Ala, Municipio Ermera nian atu hare direitamente lalao’k mediasaun ne’be aplika husi komunidade sira iha baze.

Ekipa husi ICD ne’e kompostu Prof.Watanabe, Prof. Takahashi no Mihoko Yui. Prof.Takahashi hanesan mos dosente konaba mediasaun nian iha Universidade Kobe, Japaun.

Alemde programa vizita nian, ekipa ne’e halo workshop durante loron 2 nia laran (loron 18 no 21 Dezembru 2015) iha Centro Formasaun Juridika, Caicoli Dili, hamutuk ekipa jurista DNAJL nian nomos insituisaun relevante sira hanesan PDHJ, MSS, PNTL, SEPFOPE, AATL, Defensoria Publika no diresaun nasional sira iha Ministeriu Justisa rasik hodi diskuti hamutuk konaba lei mediasaun nian, halo komparasaun ba mediasaun iha Timor Leste no Japaun nomos fahe siensia balun konaba mediasaun ne’e rasik.

Iha abertura programa ne’e, Diretur DNAJL, Nelinho Vital, informa katak, kooperasaun ba halo estudu komparativu ho Ministeriu Justisa Japaun ne’e existi ona desde tinan 2009. Iha lei lubuk ida ona sai hanesan objetu ba halo estudu hamutuk ne’e no rezulta mos buat balun hanesan lei kooperasaun judisial internasional no lei konaba droga nian. Programa ida ne’e, parte 2 mak sai benefisiu ba, tamba parte 2 ne duni mak sei servisu hamutuk ho iha projetu ida ne’e, hatutan Diretur Vital.

Alemde ne’e, ekipa husi ICD Japaun ne’e, halo mos vizita kortezia ba Sr. Ivo Valente, Ministro Justisa Timor Leste nian,. Durante sorumutu ne’e, ekipa Japaun hato’o sira nia agredesementu boot ba kolaborasaun diak ho ekipa DNAJL. Sr. Ministro mos, hatutan hela lia menon ba sira atu kontinua halo kapasitasaun nafatin ba lejislador sira iha DNAJL nomos bele haluan tan kapasitasaun ba setor seluk, hanesan Procuradoria.

Vizita kortezia ba Ministro Justisa mak hanesan programa ikus husi ekipa ICD Japaun, molok atu husik hikas Timor Leste ba Japaun.