Dili – Kuarta-Feira, loron 06 fulan-Janeiru 2016, S.E. Ministru Justisa Ivo Valente prezide primeira reuniaun Konsellu Konsultivu Ministériu Justisa ba tinan sívil 2016 iha Aula Reuniaun Ministériu Justisa, Dili.

Reuniaun Konsellu Konsultivu iha inísiu tinan 2016 involve dirijente Ministériu Justisa tomak; mai hosi dirijentes Inspesaun Jerál nian, Diresaun Jerál, Gabinete Ministru Justisa, Diretores, Defensoria Públiku, Polísia Sientifíka Investigasaun Kriminál (PSIK) no Centro Formação Jurídica.

Iha ninia lian makloke, Señor Ministru Justisa hateten, “ita-bót sira hanesan dirijente importante ba iha Ministériu Justisa nian, tan ne’e, inísiu reuniaun iha Janeiru 2016 ida ne’e, ha’u hakarak atu rona “sá” planu prioridades mais prinsipál mak sei hala'o hosi kada diresaun idak-idak iha fulan hirak tuir mai, hodi nune’e fó biban mai ha’u atu akompaña didiak servisu tomak iha ministériu ne’e.”

Tanba-ne’e, kuandu orsamentu hetan tiha promulga hosi Señor Presidente da República, konserteza ita tenke hala'o servisu maka'as liután tuir planu hodi hakonu espetasaun povu nian ba servisu justisa iha tinan ida ne'e; haktuir Ivo Velente.

Tuir mai, Ministru Ivo fó tempu uluk ba Inspetór Jerál Ministériu Justisa, Lucas António da Costa atu aprezenta planu prinsipál hosi Gabinete Inspesaun Jerál nian mak sei hala’o iha tinan 2016.

Iha oportunidade ne’e, Inspetór Lucas koalia kona-ba relatóriu inspesaun, investigasaun no auditoria ne’ebé mak sei submete ba Ministru Justisa; nia esplika Planu Asaun Anuál (PAA) Gabinete Inspesaun no Auditoria (GIA) iha tinan 2016, inspesaun no auditoria ba iha munisípiu sira, planu inspesaun no auditoria ba diresaun sira nível nasionál, no mós formasaun ba auditór sira ba nível manajeriál nian.

Relasaun ho aprezentasaun Inspetór Jerál, Ministru Ivo apresia servisu GIA nian, no enkoraja atu GIA tenke konsentra liu ba iha kontrollu, inklui kanaliza rezultadu conclusões sira hodi hatán ba asaun melhoramentu nian.

“Ha’u aseita atu iha kontrollu rigorozu ba funsionamentu jestaun no administrasaun ministériu nian, presiza kontrollu no prezensa inspetór sira, ha’u mós sei esforsu atu koordena ho Sekretáriadu FDKU (Fundu Dezenvolvimentu Kapitál Umanu) hodi finansia kapasitasaun ba auditór Ministériu Justisa nian,” promete Ministru Ivo.

Depois-de aprezentasaun hosi GIA, Ministru Justisa hanesan mós Presidente Konsellu Konsultivu, kontinua fó tempu ba Diretór PSIK, organismu autónoma sira no diretór sira iha ámbitu Ministériu Justisa.

Aprezentasaun sira-hotu iha eskopu planu prinsipál sira ne’ebé diresões sei hala’o iha tempu badak nia laran, asegura implementasaun PAA 2016, indikadór mak tenke atinzi, jestaun ba rekursu umanus, meius finansiamentu no parseriedade, no mós nível koordenasaun entre diresões sira.

Reuniaun Konsellu Konsultivu remata iha oras 11:45 meudia. Iha ninia liafuan taka, Ministru Ivo enkoraja atu diresões hotu-hotu tenki halo komunikasaun ba malu hodi labele mosu duvidas, mesmu ministériu sei hasoru menus rekursu umanus, maibé ita sempre kompleta malu no kolabora hamutuk atu nune’e servisu la’o di’ak liután kompara ho tinan kotuk.

Marka prezensa iha reuniaun ne’e mak; Defensór Públiku Jerál Dr. Sergio Hornai, Diretór PSIK Dr. Vicente Fernandes e Brito, Inspetór Jerál Dr. Lucas António da Costa, Sub-Inpetór sira, Diretór DNSPRS Dr. Helder Cosme Marçal Belo, Diretór DNHJL Dr. Nelinho Vital, Diretóra CFJ Dra. Marcelina Tilman, Diretóra DNRN Dra. Maria do Rosario Fatima C. de Araújo, Diretór DNAF Dr. Crisogno da Costa Neto, Diretór DNTP-SC Eng. Romão Guterres, Diretór DNDHC Dr. Celito Cardoso, Xéfi Gabinete Ministru Justisa Dr. Evangelino Belo, direjente sira hosi Diresaun Jerál no assessores sira.

Maria de Lourdes Xavier Lin
Media Officer
Gabinete Ministru Justisa