DILI, CFJ – Segunda-Feira, loron 11 fulan-Janeiru 2016, S.E. Ministru Justisa prezide reuniaun Konsellu Jerál Centro Formação Jurídica hodi diskute no halo apresiasaun ba programa formasaun iha tinan 2016 ba majistradu judisiais, defensoria públiku, advogadu privada no ofisiais justisa nian iha Centro Formação Jurídica (CFJ), Caicoli, Dili.

Aliénde diskute programa anuál 2016 ba CFJ, iha biban ne’e mós Membru Konsellu Jerál rona aprezentasaun hosi Diretora CFJ kona-ba relatóriu kursu formasaun iha tinan 2015; nune’e mós hala’o selesaun no aprovasaun ba kandidatura konkorrente iha pozisaun formadór internasionál juíz no prokuradór ba Centro Formação Jurídica Timor-Leste nian.

Ministru Justisa hanesan mós Presidente Konsellu Jerál fó oportunidade ba Diretora CFJ, Marcelina Tilman da Silva hodi halo aprezentasaun relatóriu formasaun ne’ebé hala’o ona iha tinan 2015 liubá.

Iha aprezentasaun Diretora Marcelina, tinan 2015, Centro Formação Jurídica hala’o ona formasaun oin-oin mak hanesan formasaun tékniku-jurídika, estudu komparativu iha Macau, kursu linguístika (lingua Portugés), no deontolójika ba majistradu, defensór públiku sira no advogadu privadu, ofisiáis justisa no notáriu.

Depois de aprezentasaun, Ministru Justisa fó oportunidade ba Konseleiru sira hodi halo apresiasaun no aprova relatóriu CFJ ba tinan 2015.

Diskusaun tuir mai, Konseleiru sira diskute kona-ba programa formasaun ba tinan 2016 nian. Iha tinan 2016, programa formasaun sei kontinua ho rekrutamentu formadu foun ba majistradu no defensoria públika; sei kontinua fó formasaun, inkluindu advogadu privadu sira ne’ebé mak sei finansia hosi Fundu Dezenvolvimentu Kapitál Umanu (FDKU).

Konsellu Jerál hókotu ho desizaun atu hala’o mós formasaun ba konservadoria, kursu ba tradutór no interpreter jurídiku, Lingua Portugés nune’e mós sei kontinua kursu ba área formasaun espesifíku balun.

Formasaun komplementár nu’udar asuntu diskusaun ne’ebé hetan apresiasaun maka’as hosi Konseleiru sira, katak formadór internasionál foun ne’ebé mak sei hahu hala’o sira-nia kna’ar iha fulan-Fevereiru tinan 2016 ne’e. Formadór sira ne’e sei foti kna’ar mós ba formasaun komplementár ba juíz, prokuradór, defensór públiku no advogadu sira.

Relasaun ho formasaun komplementár, Konseleiru sira deside atu hala’o kursu ba área direitu crianças no mulheres ne’ebé mak sei hala’o iha fulan-Agusto no Setembru. Kursu ho durasaun loron sanulu (loron 10) tuir kalendáriu ferias judisiál nian.

“Formasaun komplementár ne’e, aliénde aumenta liután koñesimentu majistradu no defensór públiku iha área direitu ciranças no mulheres, ita bele halo refreshment ba informasaun foun sira,” dehan Ministru Justisa.

Reuniaun Konsellu Jerál Centro Formação Jurídica ne’e partisipa hosi konseleiru sira mak hanesan; Ministru Justisa Ivo Valente (prezide), Presidente Tribunal Recurso Dr. Gulhermino da Silva, Procurador-Geral da República Dr. José da Costa Ximenes, Defensór Público Geral Dr. Sergio Hornai, Presidente Presidente Conselho do Gestão e Disciplina da Advocacia Dr. Nelinho Vital no Directora do CFJ Dra. Marcelina Tilman da Silva.

Maria de Lourdes Xavier Lin
Media Officer
Gabinete Ministru Justisa