DILI, MJ – Kuarta-Feira, loron 13 fulan-Janeiru 2016, S.E. Ministru Justisa Ivo Valente lidera primeira reuniaun ordinária iha tinan 2016 ba membru Konsellu Superiór Defensoria Públika (KSDP) iha Gabinete Ministru Justisa, Dili.

Iha ninia abertura reuniaun, Ivo Valente hanesan mós Presidente Konsellu Superiór Defensoria Públika deseja kontinuasaun k’manek tinan foun 2016, iha tempu mak hanesan aprezenta mós ajenda reuniaun nian ba membru Konsellu Superiór sira hodi diskute.

“Premeiru lugar ha’u hakarak deseja kontinuasaun tinan foun 2016 ba Konseleiru sira hotu, ha’u mós hakarak partilha hau-nia apresiasaun ba ita-bót sira, tanba foti prezensa iha primeira reuniaun ordinária iha tinan 2016 ba Konsellu Superiór Defensoria Públiku nian,” espresaun konvíviu Presidente KSDP Ivo Valente.

Depois de abertura reuniaun hodi komprimenta Konseleiru sira, Presidente KSDP Ivo hahu ho ajenda primeiru kona-ba apresiasaun no aprovasaun ba áta reuniaun anteriór nian. Leitura áta reuniaun anteriór hala’o hosi Sekretáriu KSDP no hetan apresiasaun hosi Konseleiru sira no halo aprovasaun.

"Aprovasaun áta anteriór ho koresaun katak, hadia nia redasaun balun, áta tuir mai tenke uniformiza tuir padraun áta ofisiál nian no kontiúdu áta tenke eskreve detallamente opiniaun sira-hotu ne’ebé mak mai hosi Konseleiru sira iha prosesu reuniaun nia laran," konklui Presidente KSDP Ivo Valente.

Tuir mai, kontinua ho diskusaun kona-ba proposta nomeasaun Defensór Públiku, responsivél Defensór Públiku munísipiu sira, regularizasaun ba estatuta ofisiais justisa iha Defensoria Públika, homologasaun rezultadu avaliasaun ba estajiariu defensoria públiku no selu-seluk tán.

Konseleiru sira, diskute iha ámbitu dezenvolvimentu institusionál nian, jestaun rekursu humanus – defensór sira no alterasaun Decreto-Lei Defensoria Públika, no mós konsolida hikas servisu Defensoria Públika.

Háfoin remata reuniaun, Konsellu Superiór Defensória Públiku kria regras ida hodi ajenda fulan tolu-tolu (3) sei konvoka reuniaun ordinária Konsellu Superiór Defensoria Públiku nian hodi akompaña progressu servisu defensoria nian no halo evaluasaun.

Marka prezensa iha reuniaun membru Konsellu Superiór mak Konseleiru Ivo Valente (Prezide), Defensór Públika Jerál Dr. Sergio de Jesus Hornai, Konseleiru Dr. Alcino Baris, Defensór Dr. Fernando Lopes de Carvalho, Konseleiru Dr. Cancio Xavier no Sekretáriu Konsellu Superiór Defensoria Públika, Xéfi Gabinete Ministru Justisa Dr. Evangelino Belo no Assessor Ministru Justisa Joaozito Viana.

Maria de Lourdes Xavier Lin
Media Officer
Gabinete Ministru Justisa