DILI,CFJ – Segunda-Feira, loron 18 fulan-Janeiru 2016, S.E. Ministru Justisa Ivo Valente hamutuk ho Defensór Públiku Jerál Dr. Sergio de Jesus Hornai fó-posse ba Defensór Públiku foun hamutuk nain-sanulu (10) iha Centro Formação Jurídica (CFJ), Caicoli, Dili.

Aliénde ne’e, Ministru Justisa mós fó posse ba Dr. Manuel Amaral nu’udar Defensór Públiku Responsável ba Munisípiu Cova-Lima nian.

Iha ninia diskursu, Ministru Justisa Ivo Valente hateten, “ha’u lori Governu nia naran, VI Governu Konstituisionál hato’o parabéns ba ita-bót sira nain-sanulu, inklui Defensór Públiku Responsável Munisípiu Cova-Lima ne’ebé mak ohin simu-posse. Tomada de posse ne’e, manifesta imi-nia esforsu no servisu maka’as durante ne’e, konta ho apoiu imi-nia família tomak nune’e ohin dezenvolvimentu defensoria públika hakat passu ida tán ba oin, parabéns ba imi-hotu.”

Semana kotuk, reuniaun membru Konsellu Superiór Defensoria Públika avalia no deside ho unanimidade, katak imi nain-sanulu priense ona kriteriu minimu hodi sai defensór públiku, ho nune’e rekomenda no subliña atu ita-bót nain-sanulu tenke tau atensaun ba prestasaun servisu; dehan Ministru Ivo.

Relasaun ho dezenvolvimentu kapasidade defensór públiku sira, Ministru Ivo husu ba defensór públiku sira atu kontinua tuir formasaun, kompleta formasaun komplementár ne’ebé sei hala’o hosi Centro Formação Jurídica, formasaun beibeik sei presta servisu di’ak liután ho kualidade ba povu hotu-hotu, tantu iha Dili no iha munisípiu sira.

“Prezensa defensór tenke to’o iha munisípiu sira, labele iha Dili de’it, ita la-buka númeru maibé importante mak kualidade apoiu no atendimentu ba ita-nia povu, tanba-ne’e, ita-bót sira nain-sanulu sei koloka; nain 4 sei koloka iha Dili, nain 3 sei fó apoiu ba iha Baucau, nain-rua sei koloka iha Cova-Lima no nain-ida seluk sei koloka ba iha Rejiaun Administrasaun Oe-Cusse,” dehan Ministru Ivo nu’udar mós Presidente Konsellu Superiór Defensoria Públika.

Sorin seluk, Defensór Públiku Jerál Dr. Sergio de Jesus Hornai fó-nia intervensaun kona-ba númeru defensór ne’ebé mak sei ki’ik, foin aumenta ba 30 maibé manifesta ona esforsu dezenvolvimentu setór justisa nian hodi konsolida instituisaun esensiál hanesan Defensoria Públiku iha mahon Ministériu Justisa.

“Ha’u agradese tanba ita iha ona 30 kuadru defensór públiku karreira maske númeru sei ki’ik, maibé orgullu ho parseria ho advogadu no ofisiais justisa sira, obstakulu hirak ne’e ita sei ultrapassa hamutuk,” hateten Defensór Públiku Jerál, Sergio Hornai.

Xéfi Defensór ne’e mós hatutan, “ho númeru nato’on ne’e, ita tenke uza ita-nia abilidade hotu-hotu no esperiénsia sira hodi aposta ba iha nessesidade povu ne’ebé mak presiza ita-nia tulun.”

Hodi remata, Sergio Hornai apela ba defensór públiku foun sira atu evita konflitu wainhira hala’o kna’ar, halo esforsu hotu-hotu hadia prestasaun servisu, independénsia, imparsialidade no servisu maka’as ba povu nu’udar determinasaun.

Serimónia tomada de posse ba Defensór Públika foun sira no Defensór Responsável hetan akompaña hosi; Juíz Konseleira Tribunál Rekursu Dra. Maria Natercia, Adjunta Prokuradora Dra. Zelia Trindade, Diretora CFJ Dra. Marcelina Tilman da Silva, Presidente Konsellu Jestaun Advogadu Dr. Nelinho Vital, Diretór Nasionál sira iha ámbitu Ministériu Justisa, membru Konsellu Superiór Defensoria Públika, Inspetór Jerál no Sub-Inspetór Ministériu Justisa, formadór nasionál no internasionál, Juíz sira, Prokuradora Distritál, Advogadu, sosiedade sívil (JSMP no Igreja), mídia no família emposadu sira.

Maria de Lourdes Xavier Lin
Media Officer
Gabinete Ministru Justisa