PRAÇA DO COMERCIO, LISBOA – Iha oras 15h30 (oras Lisboa) Kinta-Feira, loron 25 Februari 2016, hola fatin iha Sala Reunião Ministério da Justiça Portugal iha Praça do Comercio, Lisboa – Portugál asina ona Protókolu Koperasaun iha área justisa entre Ministru Justisa Timor-Leste Sr. Ivo Valente ho Ministra Justisa Portugal Sra. Francisca Van Dunem.

Asinatura protokolu ida ne'e hanesan aktu história foun tán ba rai rua ne'e, tanba iha tinan rua kotuk, kooperasaun rai rua ne'e paradu tiha nu’udar efeitu hosi expulsaun juíz no prokuradór sira hosi Portugál ne'ebé hala'o kna’ar iha Timor-Leste.

“Maibé, hahú ohin ba oin, Timor-Leste ho Portugál hadia hikas relasaun di’ak," háktuir Ministru nain-rua ne’e iha sira-nia intervensaun.

Protókolu kooperasun ne'e halo ba área justisa nian entre Timor-Leste no Portugál, ne'ebe hola konta mós Tribunál, Prokuradoria, Polísia Sientífiku Investigasaun Kriminál, Lejislasaun no mós servisu rejistu notariadu nian.

Kobre asaun kooperasaun sira iha domíniu investigasaun criminal nian, medisina legál no siénsia forense, rejistu no notariadu no direitu internasionál, polítika lejislativa, organizasaun no jestaun administrasaun prizionál no reinsersaun sosiál, asesu ba direitu no rezolusaun alternativa litíjiu nian no jestaun no planeamentu administrasaun Justisa, inklui iha área sira estatístika, arkivu, dokumentasaun jurídika no teknolojia informasaun.

Entre pontu sira ne’e, protókolu ne’e prevé asessoria téknika instituisaun judisiária Timor-Leste nian, Sentru Formasaun Jurídika no entidade sira mak kria ona, ka atu kria, ho funsaun sira iha área Medisina Legál no Siénsia Forense sira seluk.

Partisipa iha serimónia asina protókolu kooperasaun ne'e Embaixadora Timor-Leste ba Portugál Sra. Maria Paixão, Diretór DNAJL Sr. Nelinho Vital, Assessor Jurídiku Sr. João Pedro C.A. de Campos no Sra. Patricia Coutinho, Ofisiál Gabinete Ministru Justisa Sra. Solange Calapes Pires. Hosi parte Portugál nian mak Vise-Presidente Tribunál Supremu da Justisa, Presidente do Tribunal Constitucional, Prokuradór-Jerál Repúblika, Provedór Direitus Umanus no Justisa no mós Diretór-jerál sira.

Hafoin asina tiha protokólu ne'e, kontinua kedas ho reuniaun bilaterál entre Ministru Justisa nain rua ne’e.

Nelinho Vitál
Diretór Nasionál DNAJL
Ministériu Justisa