SUAI, MJ – S.E. Ministru Justisa Ivo Valente hala’o viajem servisu iha Suai hodi halo inspesaun ba finalizasaun konstrusaun Prizaun Suai, aliénde ne’e, halo mós vizita ba iha Edifísiu Defensoria Públiku Suai, Terras no Propriedades, Rejistu Notariadu Suai, Prokuradoria Repúblika Distritál no Tribunál Suai iha Munisípiu Kovalima, loron Sexta-Feira (29/04/2016).

Vizita ida ne’e atu hare’e besik funsionamentu servisu setór justisa nian iha nível munisípiu, liu-liu iha Suai. Aliénde ne’e, Ministru Ivo Valente buka rona sá dezafiu sira mak instituisaun Estadu/ Governu hasoru loron-loron, liu-liu atendimentu públiku nian.

Ministru Ivo Valente informa katak, “Ha’u-nia vizita iha Suai atu halo inspesaun ba finalizasaun konstrusaun Prizaun Suai nian, maibé uza mós tempu balun hodi halo vizita informál ba instituisaun justisa sira iha Suai, no hare’e besik sá dezafiu mak sira hasoru agora dadaun. Hanesan membru Governu responsável polítika ba área justisa nian, sei buka meius hotu-hotu hodi rezolve kestaun sira ne’ebé ita-nia servidór Estadu sira hasoru, hodi nune’e, sira-hotu bele halo atendimentu maximu ba ita-nia povu iha área judisiáriu Munisípiu Kovalima nian.”

Vizita Ministru Justisa ba iha Defensoria Públiku Suai, hare’e rasik katak, eletrisidade mate iha edifísiu ne’e, no simu informasaun katak kuaze semana-rua ona ahi ne’e mate.

Iha biban ne’e, Ministru Ivo husu ba Defensór Públiku Suai nian atu enkamiña karta ida ba iha Ministériu Justisa no nia (lee: Ministru Ivo) sei esforsu buka rezolve kestaun ida ne’e lalais.

Depois vizita Defensoria Públiku, Señor Ministru Justisa halo vizita ba iha Terras no Propriedades Suai nian. Iha vizita ne’e, Ministru Ivo halo reuniaun ho Diretór Terras no Propriedades Munisípiu Covalima António Carceres Soares, Koordenadór SNC Munisípiu Kovalima Agostinho Alves no mós funsionáriu sira hodi rona sá dezafiu mak sira hasoru, kestaun limitasaun rekursu umanus no fasilidade apoiu; inklui rona progressu arendamentu rai no propriedades Estadu nian.

Funsionáriu Terras no Propriedades Suai koalia aberta ho Señor Ministru kona-ba situasaun ne’ebé sira infrenta dadaun, no husu atu oferese meius apoiu Governu Sentrál nian hodi nune’e servisu Terras no Propriedades iha Munisípiu Kovalima bele la’o di’ak liután.

Vizita Ministru Ivo kontinua ba iha Rejistu Notariadu Suai ne’ebé akompañadu hosi Diretór Rejistu Notariadu Munisípiu Kovalima Lino Sarmento; Ministru Ivo vizita kada sala idak-idak no koalia ho funsionáriu sira, no enkoraja atu kontinua servisu nafatin ho dedikasaun ás maske hasoru limitasaun oin-oin.

Depois vizita ne’e, Ministru Ivo ba mós Edifísiu Tribunál Suai ne’ebé halo dadaun rehabilitasaun. Hosi ne’ebá, kontinua ba iha Prokuradoria Repúblika Distritál hodi hare’e servisu sira iha fatin refere, hanesan mós Eis Adjuntu Prokuradór-Repúblika, Ministru Ivo uza tempu iha Suai hosi “dizer olá” ba nia kolega sira ne’ebé foti kna’ar importante iha Munisípiu Kovalima.

Akompaña Ministru Ivo iha vizita ne’e mak; Diretór Nasionál DNSPRS Helder Cosme Marçal Belo, Xéfi Gabinete Ministru Justisa Evangelino Belo, Xéfi Departementu Inspesaun no Auditoria DNSPRS Julio Dias Ximenes no Assessor Komunikasaun Sosiál GMJ Joaozito Viana.