DÍLI, MJ – S.E. Ministru Justisa Ivo Valente halo sorumutu ho Sekretária Estadu ba Apoiu no Promosaun Sosiu-Ekonómiku Feto (SEM) Sra. Veneranda Lemos ho nia ekipa tékniku SEM nian hodi sosializa Matadalan Abordajem Jéneru ba preparasaun Planu Asaun Anuál 2017 iha Sala Reuniaun Ministériu Justisa, Díli, loron Kinta-Feira (16/06/2016).

Sorumutu ne’ebé prezide hosi Ministru Justisa Ivo Valente, atu rona perspetiva hosi parte Sekretária Estadu ba Apoiu no Promosaun Sosiu-Ekonómiku Feto – SEM, oinsá mak hatu’ur liña-baze ba planu Ministériu Justisa nian ne’ebé sensivél ba jéneru, oinsá integra iha kada setór no halo nia orsamentasaun tuir polítika VI Governu Konstitusionál.

Ministru Ivo Valente iha ninia lian makloke fó nia apresiasaun no bem-vinda S.E. Sekretária Estadu Veneranda Lemos ho nia ekipa ne’ebé hakat mai iha Ministériu Justisa hodi troka impresões no ideias kona-ba integrasaun abordajem jéneru nian ba servisu loron-loron no planu asaun anuál Ministériu Justisa iha tinan 2017.

Sosializasaun hahú ho introdusaun hosi Sekretária Estadu Veneranda Lemos kona-ba polítika Governu liu hosi SEM no SEM nia papel ba formulasaun proposta pakóte Orsamentu Jerál Estadu hodi proteje direitu feto no labarik sira. Nia fó biban ba Diretora SEM Sra. Ladhy Martins hodi esplika importansia hosi abordajem jéneru, saída mak Ministériu bele halo, finansiamentu programa jéneru iha ministériu, no ikus levanta perguntas sávi no rekomendasaun SEM nian hodi konsidera nu’udar dalan ba planeamentu no orsamentu Ministériu Justisa nian.

Hafoin ne’e, Ministru Justisa Ivo Valente, esplika katak, “ajente ofisiál, tantu mane no feto ne’ebé hetan kna’ar hanesan diretora no xéfi departementu iha Ministériu Justisa ne’e laós tanba kuota, maibé tanba sira iha duni méritu, kapasidade tékniku, abilidade, edukasaun no prestasaun servisu.”

“Ami iha feto maluk balun ne’ebé gradua maestradu hosi universidade di’ak, sira graduada ho valor ás tebes, cum-laude, sira simu kargu xéfia, sira merese atu hetan duni tanba sira méritu iha sira-nia área, no iha kapasidade tékniku no inteletuál,” esplika Ministru Ivo.

Diskusaun entre SEM ho Ministériu Justisa abranje ba programa kapasitasaun feto maluk urbana no área rurál, meius promusaun no protesaun ba feto maluk kbiit laek, espasu ba feto sira hodi dezenvolve án, infra-estrutura sensivél jéneru no proposta alterasaun Kódigu Sívil no seluk-seluk tán.

Ministru Ivo iha oportunidade ne’e fó mós tempu ba Diretór DNAF Sr. Crisogno da Costa Neto, Inspetór-Jerál Ministériu Justisa Sr. Lucas António da Costa no Diretór DNSPRS Sr. Helder Cosme Marçal Belo hodi esplika planu asaun no progressu servisu nível diresaun sira nian ne’ebé kobre abordajem jéneru.

Diskusaun no opiniaun vise-versa kuaze oras-rua ne’e, hakotu ho komprimissu hamutuk katak, sei tau konsiderasaun ba pontus prinsipál sira hodi dezenvolve no promove abordajem jéneru iha instituisaun idak-idak. Objetivu ikus mak Timor-oan hotu-hotu hetan benefísiu hosi dezenvolvementu iha aspetu hotu-hotu sem iha diskriminasaun, no laiha disigualidade sosiál no ekonomia.

Marka prezensa iha sorumutu ne’e mak; direjente ofisiál Ministériu Justisa, Diretór-Jeral, Inspetór-Jerál no Diretór sira, inklui Sekretária Estadu ba Apoiu no Promosaun Sosiu-Ekonómiku Feto (SEM), no assessor sira.