DÍLI, PN – S.E. Ministru Justisa Ivo Valente partisipa iha audiénsia públika kona-ba Proposta Lei Prevensaun no Luta Kontra Tráfiku Seres Umanus ho Komisaun A, Comissão assuntos Constitucionais, Justiça, Administração Pública, Poder Local e Anti-Corrupção iha Sala Konferénsia Parlamentu Nasionál, iha loron Kuarta-Feira (20/07/2016).

Audiénsia públika ba proposta Lei Kontra Tráfiku Seres Umanus ne’e prezide hosi Prezidente Interinu Komisaun A, Deputadu Arão Noé de Jesus da Costa Amaral no partisipa hosi membru Komisaun sira.

Iha ninia introdusaun, Ministru Ivo Valente hateten katak, “diskusaun ba lei ida ne’e nu’udar inisiativa lejislativa ne’ebé di’ak tebtebes. Aliénde nu’udar obrigasaun Timor-Leste bainhira ratifika Konvensaun Nasões Unidas Kontra Krimi Organizadu Transnasionál iha tinan 2009, lei ne’e mós ko’alia medidas atu prevene no kombate tráfiku seres umanus iha Timor-Leste, inkluindu oinsá atu halo protesaun no asisténsia ba vítima sira, espesiál ba feto no labarik sira.”

“Krimi tráfiku seres umanus konsidera hanesan krimi transnasionál, bele involve autór hosi rai liur no vítima sira iha ne’e. Tanba-ne’e, Governu Timor-Leste esforsu atu incorpora iha lei Timor-Leste nian; atu prevene, halo represaun no punisaun ba autór sira,” dehan Ministru Ivo Valente.

Depois-de Ministru Ivo Valente aprezenta objetivu prinsipál lei ne’e, Prezidente Interinu Deputado Arão Noé fó tempu mós ba Prokuradora-Adjunta Dra. Zélia Trindade no Diretór Polísia Sientífika Investigasaun Kriminál (PSIK) Dr. Vicente Fernandes e Brito hodi halo apresiasaun antes entrega ba iha membru Komisaun A sira hodi halo apresiasaun no husu klarifikasaun.

Prosesu audiénsia la’o diak tebes, deputadu sira husu klarifikasaun kona-ba penalizasaun ba autór tráfiku seres umanus, husu mós tanbasá fó indimizasaun ba vítima, oinsá distingi tráfiku umanus menores, funsionamentu no papel Komisaun Luta Kontra Tráfiku Seres Umanus, no seluk-seluk tán.

Marka prezensa iha audiénsia públika ne’e mak; Membru Komisaun A Parlamentu Nasionál, Prokuradoria-Adjunta Zélia Trindade, Diretór Nasionál PSIK Vicente Fernandes e Brito, Diretór Nasionál DNHJL Nelinho Vital, no assessores hosi Ministériu Justisa no Parlamentu Nasionál.

Maria de Lourdes Xavier Lin
Media Officer
Gabinete Ministru Justisa