MALIANA, MJ – S.E. Ministru Justisa Ivo Valente halo lansamentu ba Planeamentu Investimentu Integradu Munisipál (PIIM) iha Maliana, Munisípiu Bobonaro, loron Tersa-Feira (28/02/2017).

PIIM nu’udar mekanizmu servisu ne’ebé integradu hodi halo intervensaun iha área estratéjiku prioridades dezenvolvimentu iha nível munisípiu sira. Mekanizmu propiu ba prosesu halo planeamentu mak partisipasaun povu nian, partisipativu, katak planu sei hahú kedan hosi aldeia, depois lori ba suku hodi diskute no defini prioridades, postu no munisípiu antes lori ba Governu nasionál hodi aprova no finansia.

PIIM hanesan lista projetu infra-estrutura ne’ebé liu ona prosesu diskusaun kona-ba Planu Investimentu Munisipál hafoin prosesu konsulta ne’ebé órgaun Planu Nasionál Dezenvolvimentu Suku (PNDS) hala’o ona ho komunidade sira.

Iha serimónia lansamentu ba Planeamentu Investimentu Integradu Munisipál (PIIM) iha Maliana, Munisípiu Bobonaro, Ministru Ivo Valente kongratula povu Bobonaro tanba VI Governu hahú iha tinan 2016 halo ona delegasaun kompeténsia administrativa ba autoridade no administrasaun munisipál nian, ne’ebé determina ho alokasaun rekursu umanus, finanseiru no patrimóniu hodi jere rasik.

“Hanesan responsável polítiku, ha’u kongratula fiar ne’ebé VI Governu delega ona ba Munisípiu Bobonaro, Planu Investimentu Integradu ne’ebé mak manifesta Planu Estratéjiku Dezenvolvimentu Nasionál 2030 hodi orienta dezenvolvimentu Estadu nian. Saída mak Estadu hakarak atu atinzi, atu ba ne’ebé, no Bobonaro iha tinan 2030 oinsá lós, nune’e hodi atinzi meta artigu 6, Konstituisaun RDTL kona-ba objetivu Estadu nian,” dehan Ministru Ivo Valente.

Ministru Ivo Valente mós informa katak, foin dadaun ne’e, Parlamentu Nasionál aprova ona Lei Rai, Rejime Titularidade Bens Imóvel; Lei Expropriasaun ba Utilidade Públiku no Lei Baze ba Ordenamentu Territóriu. Nia esklarese katak, lei hirak ne’e importante hodi fó apoiu ba planeamentu, defini atribuisaun no na’in ba rai, no ordena territóriu ba interese dezenvolvimentu nian no prosesu fó indemnizasaun.

Nia mós husu atu halo planu ho realistiku, define prioridade hosi prioridade sira no kustu ne’ebé razuável, atu nune’e bainhira planu Munisípiu Bobonaro nian to’o iha meza Konsellu Ministru, ha’u bele defende no iha razões atu argumenta.

Iha nia liafuan ikus, Ministru Ivo Valente apela ba autoridade lokál sira atu kontinua servisu hamutuk ho povu hodi rekoilla informasaun didi’ak, defini planu prioridade sira, rona no buka solusaun ba povu nia problema. No importante liu tanba besik dadaun Eleisaun Jerál, autoridade lokál sira tenke kolabora ho povu hodi asegura páz no estabilidade iha idak-idak nia suku.

Iha sorin seluk, Prezidente Autoridade Munisípiu Sr. Jeferino Soares dos Santos iha nia liafuan abertura agradese prezensa Ministru Justisa nian, inklui Administradór Postu no Xéfi Suku sira hodi partisipa iha lansamentu prosesu ba Planeamentu Investimentu Integradu Munisipál (PIIM). Lansamentu PIIM marka ho kuda ai-oan, signifika hodi hatu’ur fini no sei koilleta nia rezultadu iha futuru oin mai.

Iha lansamentu ne’e, Diretór Nasionál Servisu Instalasaun Munisípiu, Ministériu Estatál Sr. Aderito Guterres halo mós aprezentasaun kona-ba prosesu halo Planu Investimentu Integradu Munisipál (PIIM), oinsá defini prioridades, kalendáriu hodi submete planu hahú hosi Aldeia, depois Suku, Postu, Munisípiu to’o Governu Nasionál.

Diretór Aderito halo aprezentasaun tékniku, planu no orsamentál, funsionamentu PNDS no Planu Integradu Munisípiu, Konsellu Koordenasaun Munisipál no seluk-seluk tán.

Serimónia lansamentu Planeamentu Investimentu Integradu Munisipál (PIIM) Munisípiu Bobonaro hahú ho kuda ai-oan, kontinua ho abertura hosi Prezidente Autoridade Munisípiu Bobonaro, depois rona aprezentasaun tékniku hosi Ministériu Estatál, hafoin ne’e, Ministru Justisa halo lansamentu.

Marka prezensa iha lasamentu PIIM ne’e mak; Diretór-Jerál Ministériu Justisa Sr. Henrique de Oliveira Ximenes, Xéfi Gabinete Ministru Justisa Sr. Evangelino Belo, Administradór Postu sira hosi Munisípiu Bobonaro, Xéfi Suku sira, autoridade Munisípiu no diretór sira iha ámbitu Ministériu Estatál.

Maria de Lourdes Xavier Lin
Media Officer
Gabinete Ministru Justisa