Mj Interino Fó Posse Ba Empozado 21 Iha CFJ

Versão para impressão

DÍLI -Ministru Justisa Interino atuál Sekretáriu Estadu Terras Propriedades (SETP) Jaime Xavier Lopes iha loron 18 fulan-Maiu 2017 foin lalais ne’e fó posse liuhosi asina termu Aseitasaun nian ba empozadu sira ámbitu Ministériu Justisa nian hamutuk nain 21 iha Salaun Enkontru Centro Formasaun Jurídika Caicoli Díli.
Iha seremonia asina ba termu aseitasaun nian ne’ebé hetan partisipasaun hosi Komisária Funsaun Públika, Diretór PCIC no diretores nasionáis ámbitu ministériu justisa ne’e SETP husu ba ba empozadu sira tenki asumi sira nia knár tuir fusaun idaidak nian hodi bele fó atendementu ba públiku ho di’ak no imparsiál.

“Ha’u husu ba empozadu sira tenki tau intrese públiku nian ás liu intrese hotu-hotu, tanba liu hosi ita nia atendementu ba públiku ho di’ak foin bele hatudu lolos ita nia profisionalizmu hanesan funsionáriu públiku. Bainhira funsionáriu ida la tau intrese ema hotu nian iha nia servisu fatin sei kria impaktu negativu ba instituisaun estadu nian liu-liu Ministériu Justisa nian,” dehan Jaime.

Ministru Justisa interinu ne’e salienta mós katak, funsionáriu públiku mak makia estadu Timór-Leste nian, tanba ne’e bainhria funsionáriu sira mak hala’o sira nia knár la ho di’ak sei estraga mós makina estadu nian no naran instituisaun nian ne’ebé maka funsionáriu sira servisu ba.
Iha fatin hanesan, Komisária Funsaun Públika, Maria Domingas Fernandes Alves hato’o ninia agradesementu ba iha empozadu sira, tanba bele asumi kargu nune’e mós nia knár foun ba sira nia kareira hanesan funsionáriu públiku iha instituisaun Justisa nian.

Iha biban ne’e Eis Ministra Solidaridade Sosial ne’e mós husu ba funsionáriu sira ne’ebé maka foin hetan pose atu bele hala’o sira nia knár tuir lei funsaun públika nian maka estabelese.
Komisaria ne’e realsa mós, nia parte valoriza tebes Ministériu Justisa, tanba sempre buka loron no data imoprtante no istóriku sira hodi bele hala’o atividade, loron istóriku hirak ne’e mak halo ohin loron ema hotu goza inklui mós empozadu sira mak foin hetan termo aseitasaun nian.
Nia mós husu ba empozadu sira, liu-liu ba sira ne’ebé mak hala’o sira nia knar iha atendementu publiku nian tenki iha onestidade nune’e mós husu atu fó atendementu ne’ebé hanesan ba sidadaun hotu-hotu hodi labele kria fali ninia impaktu negativu ba iha instituisaun.

Iha fatin hanesan Diretóra Jerál Interia, atuál Diretora Sentru formasaun Jurídika, Marcelina Tilman hato’o mós ninia agradesementu ba komisaun funsaun públika ne’ebé maka hamutuk ho MJ hodi hala’o rekrutamentu ba funsionáriu foun sira, tanba ho funsaun públika nia esfeorsu tomak mak to’o oras ne’e MJ bele konklui ona funsionáriu nain 21 ne’ebé asina ona termus aseitasaun nian .

Diretóra ne’e esklarese mós, funsionáriu hirak mak hetan ona termu aseitasaun nian ne’e nain 15 konkore ba iha funsionáriu Públilu, no nain 6 konkore ba iha guarda prizionais, nune’e mós iha vaga 35 ba guarda prizionais prizaun Covalima nian mak oras ne’e sei iha hela prosesu rekrutamentu.
Iha seremonia asina termo aseitasaun ne’ebé maka hetan partisipasaun masimu hosi dirizentes no funsionáriu MJ nian ne’e, Marcelina husu ba empozadu sira tenki hala’o sira nia knar tuir regra, lei no responsablidade tomak hodi bele fó atendementu ne’ebé maka di’ak liu ba iha komunidade sira.*

Ananias Babo Horta
Mídia Officer SETP