Lolotoe – Ministériu Justisa (MJ) liu hosi Diresaun Nasional Direitus Umanus no Cidadania (DNDHC) hala’o divulgasaun lei durante loron ida ho komponente komunidade suku rua mak hanesan Suku Lebos no Gildapil. Programa ne’e hala’o iha igreja katolika Suku Gildapil, Postu Administrativu Lolotoi, loron 8 Juñu 2017.

Iha sesaun abertura Diretur DNDHC hateten, “programa divulgasaun lei ne’e hala’o bazeia ba Planu Asaun Annual Ministeriu Justisa 2017 nomos despasu Ministru Justisa ne’ebé bazea ba pedidu husi Sefi Suku nain rua. Alende ne’e MJ tinan tinan sempre divulga lei no agora dadauk konsentra ba postu administrativu inklui suku sira. Divulgasaun lei ne’e ho objetivu atu hasa’e konesementu komunidade sira nia kona-ba lei hirak ne’ebé sai prioridade hanesan Lei Kontra Violensia Domestika, Krime Falsifikasaun Dokumentus, Krime Eleitoral inklui Mekanisme Hato’o Keixa.

Iha fatin hanesan, Administrador Postu Lolotoe, Almeiro Pereira dos Reis hateten, “ami agradese ba Diretur ho nia komitiva hosi Ministériu Justisa tamba bele mai iha ami nia area hodi divulga lei. Iha Lolotoe ne’e violensia domestika as no sempre hato’o ba Sefi Suku no Polisia, ita hatene hahalok ne’e krime ne’ebé se mak halo krime lei mak sei hasoru nia no hau rekomenda para atividade hanesan ne’e bele hala’o mós iha suku sira seluk ne’ebé izoladu tebes.”

Iha divulgasaun lei ne’e, materia ne’ebé mak apresenta mak hanesan Lei Kontra Violensia Domestika, Krime Falsifikasaun Dokumentus, Krime Eleitoral inklui Mekanismu Hato’o Keixa, idepois halo apresentasaun ba materia sira, kontinua loke ba sesaun husu no hatan, iha sesaun ne’e komunidade nain lima mak husu perguntas.

Partisipante ne’ebé prezensa iha divulgasaun lei ne’e hamutuk ema atus ida lima nolu resin walu (158) kompostu hosi Administrador Postu Lolotoe, Sefi Suku Gildapil no Lebos, Komandante Eskuadra PNTL Lolotoe nian ho nia membru, Sefi Aldeia sira, Reprezentante Juventude Feto no Mane, Lia Nain no komunidade sira seluk. (C)

Carmelindo da Silva Caetano
Tekniku Superior, DNDHC MJ