MJ Interinu hala’o lansamentu Postu Tránjitu iha Gleno

Versão para impressão

GLENO Ministru Justisa (MJ) interinu atuál Sekretáriu Estadu Terras Propriedades (SETP) Jaime Xavier Lopes, iha loron segunda, 24 fulan-Juñu 2017 foin lalais ne’e hamutuk ho SEPFOPE hala’o lansamentu ba Konstrusaun Postu Polisia Tránjitu ne’ebé mak sei konstrui hosi Prizioneiru sira iha Gleno Munisípiu Ermera.

Hafoin lansamentu ba konstrusaun, MJ interinu, Jaime Xavier Lopes hateten, ne’e hanesan pasu importante ida ne’ebé maka SEPFOPE kria, tana ne’e hanesan mós parte ida hodi bele fó kapasitasaun ba iha Prizionéiru sira, nune’e mós bele aumenta kapasidade prizioneiru sira nian iha area konstrusaun.

Jaime hateten, prizioneiru sira ne’ebé maka sai mai liur hodi halo kontrusaun ne’e, sira nia tinan ba kastigu nian besik hotu ona, no sira mós hetan dokumentus legál hosi Tribunal hodi aseita sira bele sai ba liur hodi halo konstrusaun.

Iha lansamentu tau fatuk-ain ne’ebé hetan partisipasaun hosi Prezidenti Autoridade Munisípiu Ermera, Komandante PNTL Munisípiu, Diretór DNSPRS no lideransa komunitária sira inklui mós prizioneiru sira ne’e, tuir Jaime hanesan projetu ida ne’ebé maka mai hosi SEPFOPE hodi bele fó treinamentu ba prizioneiru sira iha prizaun.

Governu liuhosi MJ liu-liu Diresaun Nasionál Servisu Prizionais no Reinsersaun Sosiál (DNSPRS) ho hanoin oinsa mak prizioneiru sira bele iha atividade hodi sira labele hanoin sira nia aan hanesan dadur, ho hanoin ida ne’e maka hodi ofrese treinamentu hanesan karpintaria, kustura ho treinamentu sira seluk, nune’e bainhira sira nia pena hotu sira fila ba komunidade sira nia leet bele halo netik buat ruma, ne’ebé maka bele benefisia sira nia aan no sira nia família.

“Ha’u atu dehan deit katak, bainhira prizioneiru sira ne’ebé maka hetan oportunidade hodi halo konstrusaun iha liur ne’e bele hatudu izemplu ne’ebé di’ak ba iha komunidade sira, entaun iha futuru sira iha oportunidade bele sai fali hanesan treinadór ba maluk prizioneiru sira seluk,” dehan Jaime.

Iha fatin hanesan Sekretáriu Estadu SEFPOPE, Ilidio da Costa Ximenes hateten, lansamentu fatuk dahuluk ba Postu Tránjitu iha Gleno ne’e atu hanorin przioneiru sira mak ho profisaun hanesan badaen iha prizaun Gleno, tanba antes ne’e sira hetan ona formasaun kona-ba oinsá mak atu produz tizolu no atu halo uma ho tizolu ne’ebé abilidade sira iha ona, presiza halo prátika ida hodi hatudu sira nia kapasidade to’o iha ne’ebé.

Iha lansamentu ne’ebé hetan parisipasaun hosi Sekretáriu Estadu Polítika Formasaun Professionál no Empregu (SEFOPE), Komandante PNTL Munisípiu Ermera, Prezidente Autoridade Munisípiu Ermera, Amu Pároku Gleno, inklui mós Konandante F-FDTL Munisípiu Ermera, inklui mós Diretór DNSPRS Guarda Prizionais no Prizioneiru sira ne’e, tenik Ilidio.*

Ananias Babo Horta
Mídia Officer SETP