Ministériu Justisa liuhosi DNSPRS no DNDHC Disemina Prosedimentu Indultu no Direitus Umanus ba Prizoneiru sira iha Prizaun Becora

Versão para impressão

Dili - Ministériu Justisa (MJ) liuhosi Diresaun Nasional Servisu Prizional no Reinsersaun Sosial (DNSPRS) no Diresaun Nasional Direitus Umanus no Cidadania (DNDHC) servisu hamutuk hodi disemina informasaun lei kona-ba indultu no direitus umanus ba Prizoneiru sira iha Prizaun Becora, iha loron 1 nomos 6 Fevereiru 2018.
Objetivu husi atividade ne’e atu fahe informasaun ba prizoneiru sira kona-ba prosesu oinsa atu bele hetan indultu no ninia kriteria saida deit tuir lei. Hetan informasaun lei nato’on sei afeita ba mudansa karateria sidadaun sira hodi prevene no foti asaun tuir lei karik infrenta problema ruma. Ho nune’e, kapasitasaun ba informasaun lei importante hodi reforsa hadalan sidadaun ba paz no justisa. Chefe Departementu Reinsersaun Sosial, Domingos Afonso Ximenes, iha introdusaun hateten, “ami mai iha fatin ida ne’e ho DNDHC ho intensaun disemina informasaun lei kona-ba indultu no direitus umanus hanesan kapasitasaun ida ba prizoneiru sira hodi hatene saida mak indultu ho ninia lalaok balun, ne’ebé hau husu ita bo’ot sira asisti karik enkuandu la komprende presija husu tamba iha sesaun husu no hatan.”
Iha fatin ne’ebé hanesan, Diretór DNDHC, Flaviano Moniz Leão, iha abertura hateten, Ami mai iha ne’e laos atu mai hanorin ita bo’ot sira maibe ami mai fahe informasaun Lei Nu. 5/2016 kona-ba prosedimentu hodi fó indultu nomos fahe informasaun direitus umanus, ita sei hatene saida mak indultu, se deit mak bele hetan indultu ho ninia prosedimentu.”
Iha sesaun loron sorin ne’e kuaze oras ha’at nia laran fasilita direita hosi ekipa diresaun rua mak hanesan DNSPRS no DNDHC. Materia sira ne’ebé disemina mak hanesan, Lei nu. 5/2016 kona-ba Prosedimentu hodi fo Indultu nomos Informasaun Direitus Umanus. Iha sesaun husu no hatan, partisipante barak mak husu li-liu kona-ba prosedimentu indultu nian. Partisipante ne’ebe tuir sesaun loron rua ne’e hamutuk prizoneiru 148. Iha sesaun ne’e asiste hosi Diretór Prizaun, Diretór DNDHC, Chefe Departementu sira, Asesora DNDHC, tekniku sira no guarda balun. (C)

Carmelindo da Silva Caetano
Tekniku Superior, DNDHC MJ