EMBAIXADORA ESTADUS UNIDUS AMERIKA HALO VIZITA KORTEZIA MAI MINISTÉRIU JUSTISA HODI KONGRATULA MINISTRU JUSTISA

Dili, MJ: S.E. Ministru Justisa, Dr. Manuel Cárceres da Costa, Tersa-Feira (31/07/2018) ohin, simu audensia Embaixadora Estadus Unidus Amerika (EUA) ba Timor-Leste, Sra. Kathleen M. Fitzpark ho ekipa, iha serbisu fatin, Rua Justisa, Dili.
Iha vizita kortezia ne'e Sra. Embaixadora ho ninia ekipa hato'o ninia votus parabéns ba Ministru Justisa, Dr. Manuel Cárceres, nuudar Ministru Justisa foun ba Periodu 2018-2023. Aleinde kongratula Ministru Justisa, Sra. Kathleen M. Fitzpark mós kompromete hodi kontinua suporta Ministériu Justisa iha setor justisa nian no suporta ba Estadu Direitu Demokratiku.

Ba Ministru Justisa, Embaixadora EUA, Sra. Kathleen M. Fitzpark, husu atu haforsa liutan kooperasaun, no kompromete atu kontinua hametin liutan kooperasaun hirak ne'ebé iha ona liuliu iha setor justisa ninian; hanesan iha kapasitasaun ba Polisia Sientifiku Investigasaun no Kriminal (PSIC) nomós assitensia ba iha Centru Formasaun Jurídiku e Judisiariu (CFJJ).
Ba Jornalista sira Sra. Embaixadora haktuir katak "Hau Sente honoradu tebes, bele hasoru no kongratula S.E. Ministru Justisa, hodi kongratula Ministru Justisa no koalia mós sobre parseria entre Estadus Unidus Amerika ho Timor-Leste.

"Estadus Unidus Amerika mós iha kooperasaun bilateral ho Timor-Leste iha setór Justisa, hanesan haruka peritus sira hodi fó treinamentu ba advogadu, Juíz no Polisia Sientifiku Investigasaun e Kriminal, " Sra. Embaixadora hatutan.
Iha mós diskusaun importante ida mak hanesan Millennium Challenge Corporation Compact (MCC), mak Projetu ida ne'ebé ho ninia objetivu atu dezenvolve no promove kresimentu ekonomia iha rai laran, liuliu haree ba ambiente negosiu iha Timor-Leste.
Iha intervensaun, Ministru Justisa, Dr. Manuel Cárceres, agradese tebes ba vizita kortezia Embaixadora ho ninia ekipa hodi hametin liutan lasu kooperasaun entre Timor-Leste ho EUA iha setór Justisa nian.
Agradese mós ba suporta no assistensia hirak ne'ebé Estadus Unidus Amerika ofrese ona ba Timor-Leste liuhusi ninia Embaixada.

enkontru ne'e partisipa mós husi ekipa Embaixada Estadus Unidus Amerika no Asessor/a Jurídico no xefe Gabinete Ministériu Justisa nian.

31 Jullu 2018

Media_Gabinete_MJ