Dili, MJ: Reuniaun importante entre S.E. Ministru Justisa Timor-Leste Dr. Manuel Cárceres da Costa ho ninia Homólogo Ministra Justisa Portugal Dra. Francisca Van Dunem, hala’o iha eskritóriu Ministériu Justisa Praça do Comércio Lisboa.
Objetivu husi reuniaun ida ne’e koalia kona-ba kooperasaun setór Justisa iha Timor-Leste ne’ebé hetan apoiu barak husi atores Judisiál Portugal hahú iha tinan hirak liu ba to’o ohin loron. Liu husi reuniaun ida ne’e Sua Exelénsia Ministru Justisa Timor-Leste Dr. Manuel Cárceres da Costa, esprexa ninia agradesimentu ba Governu Portugal ne’ebé iha tempu difisil nia laran asiste nomós hamutuk ho Governu Timor-Leste estabelese sistema Judisiál. Liu-liu apoiu hirak relasiona ho rekursu umanu hodi haruka atores Judisiál mai Timor-Leste iha Tribunal Rekursu, Tribunal distrital, Prokuradores, Defensores Públika, Sentru Formasaun Jurídika ho Judisiál Kaikoli, asesor Legál iha instituisaun sira Estadu nian, nomos apoiu seluk iha setór justisa hodi haforsa liu tan área importante ida ne’e.

Sua Exelénsia Ministru da-Justisa Timor-Leste husu atu Governu Portugal kontinua apoiu setór Justisa hodi fo asisténsia ka konsellu ba atores Judisiál sira iha Tribunal, Prokurador nomós Defensoria Públika. Governu Portugal liu husi S.E. Ministra da-Justisa Portugal Dra. Francisca Van Dunem, simu ho laran haksolok no konsidera Timor-Leste ho Portugal hanesan ‘país irmão’, nune’e disponível fó nafatin sira nia asisténsia ba setór Justisa Timor-Leste.
Reuniaun ida ne’e akompaña husi Embaxador Repúblika Demokrátika Timor-Leste ba Portugal Sra. Maria Paixão, Diretóra Jerál Ministériu Justisa, Diretur Nasionál Asesoria Jurídika ho Lejislasaun, Asesores Jurídikus ho Sekretária Ministru Justisa.

3 Dezembru 2018