SETP Inagura Edifisiu DTPSC Manufahi

Ministériu Justisa (MJ) liuhosi Sekretáriu Estadu Terras Propriedades (SETP) Mario Ximenes, iha loron 27 fulan-Marsu 2019, folin lalais ne’e hala’o inagurasaun ba edifísiu foun DTPSC munisípiu Manufahi.

SETP hateten, projetu ne’e hahú iha 2012, edifisiu hosi Diresaun Nasionál Rejistu Notariadu (DNRN) Ministériu Justisa nian hahú mak konstrusaun edifísiu hosi Diresaun Terras Terras Propriedades no Servisu Kadastrais nian foin hahuu konstrusaun.

Edifisiu refere tuir SETP hanesan uniforma ida, tanba edifisiu DTPSC ho DNRN nian iha munisipiu hotu-hotu ho modelu ida de’it no besik malu, nune’e bele fasil ba komunidade sira iha parte atendimentu públiku nian.

Ministériu Justisa liuhosi Sekretáriu Estadu Terras Propriedades urjentemente hala’o inagurasaun ne’e ho nia objetivu, oinsá mak Diresaun Terras Propriedades bele instala ninia servisu nune’e mós oinsá mak atu halo atendimentu públiku ba komunidade sira ho di’ak liutan iha munisípiu Manufahi.

Kona-bá kompaña ne’ebé kaer obra, SETP husu atu kompaña na’in tenke iha responsabilidade ba ninia traballadór sira, estadu nunka estraga no halakon ninia povu, dalaruma ninia prosesu pagamentu mak halo hamosu dezentendimentu entre parte rua.

“Hanesan membru governu ha’u apresia nafatin servisu kompaña nian, tanba maske kleur no iha fallansu maibé kumpre duni ninia devér hodi finaliza ninia obra ba konstrusaun. Dalaruma, prosesu finál ohin ita koa fita ne’e mak foin bele loke dalan ba prosesu pagamentu ba traballadór sira,” tenki Mario Ximenes antes ko’a fita ba inagurasaun.

Iha biban ne’e SETP mós husu ba traballadór sira hodi labele prende xave, tanba prosesu pagamnetu ba traballaldór sira la’ós responsabilidade governu nian maibé ne’e responsabilidade kompaña ne’ebé mak kaer obra.

Iha fatin hanesan Diretór Terras Propriedades no Servisu Kadastrais Munisípiu Manufahi, Marino Cortereal e Tilman Laranjeira hateten, hanesan ajénsia nia parte sente kontente, maibé kona-bá tékniku nia parte la hatene.

Relasiona ho fallansu pagamentu ba traballadór sira Marino hateten, iha tempu badak sei buka atu resolve tanba nia parte sei hamutuk ho autoridade munisipál sira sei buka meius hodi bele rezolve.

Diretór ne’e hateten, hakarak lakohi tenki entrega xave, hanesan manufahi oan molok kompanha atu kaer fali obra ruma tenki haree didi’ak molok fó projetu.

Hanesan uma-na’in Administradór Munisípiu Manufahi Arantes Isac Sarmento, lori administrasaun munisípiu nian hato’o agradese ba SETP ho nia kometiva tanba bele ba halo inagurasaun iha ba edifísiu DTPSC.

Administradór mós rekoñese duni problema entre kompaña ho taraballadór sira iha duni problema. Obra ba konstrusaun ne’ebé konstrui hosi kompaña Kablaki Engineering Unipessoal Lda ne’e hanesan projetu pilotu ba munisípiu tolu, hanesan Aileu, Ainaro no Manufahi, tanba materiál ba konstrusaun la’ós hanesan materiál konstrusaun sira bain-bain maibé nia seluk, tanba nia moru sira uza hotu gabus.

Adminitradór ne’e hateten, edifísiu ne’ebé konstrui ne’e ba estadu no manufahi oan, tanba ne’e atu fó atendimentu ba povu. tanba ne’e, husu komunidade sira hodi bele tau matan ba edifísiu ne’ebé foin inagura, ne’e kompanha na’in mós tenki iha responsabilidade.

Inagurasaun ba Edifisiu ne’e rasik hetan partisipasaun hosi SETP, Xefe Gabinete SETP, Diretora Jerál MJ, Sub Inspetór ba Gabinete Inspesaun Auditoria MJ, Diretor Nasional hosi DNTPSC, Diretór Nasionál hosi DNRN-MJ, Reprejentante Defensór Públiku Jeral, inklui mós Diretór Terras Propriedades hosi Munisípiu Aileu, Covalima no Manatuto inklui mós xefe Departamentu no Funsionáriu sira ámbitu DNTPSC. *

Ananias Babo Horta
Relasaun Públika DNTPSC