Díli-Ministériu Justisa, liu hosi komisaun organizadora ba komemorasaun loron funsaun públika, iha loron 16 fulan-Maiu 2019 foin lalais ne’e realiza Sorumutuk tékniku desportivu ba dahuluk nian hodi prepara ba komemorasaun loron funsaun públika ne’ebé maka sei realiza iha loro 5 fulan-Jullu 2019.

Hanesan uma-na’in Vise-Prezidente Komisaun Organizadora, Atuál, Diretór Nasionál Servisu Prizionál no Rensersaun Sosiál, (DNSPRS) Ministériu Justisa, Helder Cosme Marçal iha ninia abertura hateten, komemorasaun loron funsaun públika ne’e importante tebes ba ajente estadu nian liu-liu ba funsionáriu públiku sira hotu, tanba ne’e husu ba ajente hotu-hotu tenki fó partisipasaun másimu ba iha eventu sira mak hala’o hosi Komisaun Funsaun Públika.

“Ha’u husu ba partisipante hotu tenke fó partisipasaun másimu ba iha eventu ne’e, tanba liu hosi eventu sira hanesan ne’e maka funsionáriu públiku sir abele koinese malu di’ak liutan,” tenik Helder.

Nia hateten, jogu ne’ebé maka sei hahuu iha loron 23 fulan-Maiu no sei termina iha loron 5 fulan Jullu ne’e ho nia modalidade neen mak hanesan Foot Sal, Basket ball, Volley ball, Badminton, table tennis no chess.

Hanesan uma na’in kordenadór Desportivu ba komemorasaun loron funsaun públika, Joaquim Ramos da Costa Gomes husu ba partisipante sira hotu, liu-liu ba jogadór hosi modalidade neen ne’e nian tenki fó partisipasaun másimu durante hala’o eventu.

Joaquim informa mós, hosi modalidade neen ne’e, sei involve liña ministeriais inklui mós autonomos sira hamutuk 45, no hosi modalidade desportivu neen ne’e sei partisipa hosi mane no feto.*