SETP hala’o vizita urjenti ba DTP munisípiu sira iha parte leste

Sekretáriu Estadu Terras Propriedades (SETP) Mario Ximenes iha loron, 6 to’o 9 fulan-Maiu 2019 foin lalais ne’e hala’o vizita urjenti ba Diresaun Terras Propriedades no Servisu Kadastrais (DTPSC) inklui mós Kastóriu Notariadu Munisipiu nian sira iha parte leste nian hanesan, Munisípiu Baucau, Lautem no Viqueque hodi haree besik liutan servisu funsionariu sira nian iha munisípiu.
Iha vizita servisu SETP nian ba munisípiu ne’e, hodi bele haree di’ak liutan komportamentu funsionáriu sira nian inklui mós atendimentu funsionáriu sira nian ba iha komunidade sira iha munisípiu la’o ho di’ak ka lae.

Iha vizita urjenti ne’ebé hala’o hosi SETP ne’e ho nia objetivu oinsá atu superiór sira bele hakbesik-an hodi bele haree di’ak liutan servisu sira iha munisípiu.
“Ha’u hallo vizita ne’e hanesan vizita previu ida ne’ebé hakarak haree mós funsionáriu sira nia prezensa iha servisu fatin, tanba ne’e ha’u ba iha oras ne’ebé maka servisu nian liliu iha oras tama no sai servisu nian,” dehan SETP.

Membru Governu ne’e preokupa mós ho ekipamentu eskritóriu nian sira, hanesan meza ho kadeira sira ne’ebé ho kondisaun aat hotu. Tanba ne’e nia parte sei buka meius hodi bele rezolve, tanba oinsá mak atu bele hetan prestasaun servisu ne’ebé di’ak maibé kondisaun servisu rasik la di’ak.
Durante vizita, hosi parte Notariadu iha munisípiu mós hato’o sira nia preokupasaun, liu-liu kona-bá dokumentus sira hanesan Bilete Indentidade sira labele fó ba rekerente sira tanba blanko la iha.

Diretór DTPSC munisípiu Baucau hato’o mós problema ne’ebé durante ne’e sai hanesan prekupasaun Diresaun Terras Propriedades Munisípiu Baucau nian liu-liu kona-bá ekipamentu informátika inklui mós ATK sira.
Diretór ne’e informa mós kona-ba difikuldade ne’ebé durante ne’e Diresaun Terras Propriedade Munisípiu Baucau hasoru mak, menus rekursu umanu, transporte, no materiál eskritóriu.
Iha biban ne’e nia mós sujere ba SETP hodi bele estabilese lalais lei divizaun teritóriu, estabilese komisaun das terras, nune’e mós presiza hadi’a difikuldade sira ne’ebé maka durante ne’e diresaun hasoru.*

Ananias Babo Horta
Relasaun Públika DNTPSC