DÍLI-Diretór Sesante ba Diresaun Nasionál Terras, Propriedades no Servisu Kadatrais (DNTPSC-Sigla Portugés) iha loron 1 fulan-Agostu 2019 foin lalais ne’e, entrega servisu ba Diretór Jerál Terras Propriedades (DGTP) ho nia diretór Nasionál Nain tolu.
Re-entrega servisu refere bazeia ba dekretu Lei nú.10/1209-14 fulan-Juñu 2019 kona-bá orgánika Ministériu Justisa nian liu-liu iha artigu 18 kona-bá estabilesimentu diresaun jeral das terras e propriedades no desizaun Komisaun Funsaun Públika nú.3241/2019/CFP ho data 18 fulan-Jullu 2019, kona-bá nomeasaun kargu diresaun jerál das Terras e propriedades.

Antes re-entrega servisu diresaun nian hosi Diretór Nasionál sesante ba diretór Jeral ho nia estrutura foun sira, Sekretáriu Estadu Terras Propriedade (SETP), Mario Ximenes hato’o ninia agradesimentu ba Diretór nasionál sesante no mós diretór jeral foun ho diretór nasionál na’in tolu.
Mario hateten, kargu bele troka hosi ema ida ema seluk maybe instituisaun nunka troka, tanba ne’e maske diretór sesante la assume ona kargu iha diresaun hodi assume fali kargu ne’ebé responsavél liu iha ámbitu Ministériu Justisa nian maibé hanesan ema ne’ebé hatene liu diresaun nia lala’ok tenki buka meius oinsa hodi bele servisu hamutuk nafatin ho dirijenti foun sira iha futuru.

Hanesan membru Governu Mario Ximenes mós husu ba Dirijente foun sira tenki assume knár ne’ebé mak superiór sira fó fiar ho responsabilidade hodi bele hala’o servisu ho di’ak iha futuru.
Iha biban ne’e membru governu daualuk nian ne’e mós husu ba dirijenti foun sira, hodi entrega naran ba kargu xefia nian iha diresaun nia laran antes loron 15 fulan-Agostu 2019.
SETP salienta mós, reslasiona ho estabilesimentu diresaun jeral iha Terras Propriedades ne’e, buka oinsa atu bele halo di’ak liutan buat ne’ebé presiza hadia.
Relasiona ho servisu diretór sesante nian iha futuru membru governu ne’e hateten, knár ne’ebé diretór sesante ba assume hanesan knar ida ne’ebé dignu, tanba sei assume hikas knar hanesan Sub Inspetór ba Gabinete Inspesaun Auditória (GIA) Minisnistériu Justisa nian, relasiona ho koinesimentu ninian kona-ba Terras.

Antes hosik DNTPSC hodi ba assume hikas knár foun iha Ministériu Justisa, Diretor Sesante DNTPSC, Horacio da Silva hateten, ema mak troka malu maibé instituisaun nunka troka.
Kabe ba deklarasaun Ministru Justisa (MJ) ho Sekreteariu Estadu Terras Propriedade (SETP) ba governasaun daualuk nian ne’ebé hateten sira sei la troka ema maibé buka atu mellora di’ak liutan, tanba ne’e ami fiar katak, kargu xefia la hatun maibe subida, ida ne’e mak akontese duni, hanesan funsionariu tenke kumpre desizaun ne’ebé foti hosi superiór sira, tenik Horacio.
Iha fatin hanesan Diretór Jeral das Terras e Propriedades (DGTP-sigla Portugés), Rodrigue Mendonça hato’o ninia agradesimentu ba iha ba iha SETP ho MJ inklui mós diretór Terras Propriedades sesante sira katak, ho sira hotu ninia esforsu tomak mak DNTPSC bele transforma ba diresaun jerál iha ukun governasaun daualuk nian ne’e, ida ne’e hanesan istreoria foun ida ne’ebé akontese ba iha diresaun DNTPSC.
Kona-bá servisu Xefe Departamentu ba Atribuisaun ba Titlu no Rejistu Predial ne’e hateten, nia sei esforsu-an hodi bele hala’o ninia funsaun tuir knár ne’ebé mak hetan, nune’e mós hanesan funsionáriu públiku nia sei tau intrese públiku ás liu interese privadu.

Diresaun hirak mak oras ne’e estabilese ona iha Terras Propriedades nian mak hanesan Diresaun Jeral das Terras e Propriedades (DGTP) lidera hosi Rodrigue Mendonça, Diresaun Nasionál Gestão de Terras e Proriedades (DNGTP) lidera hosi Francisco R. Borges Guterres, Diresaun Nasionál Informasaun no Geoespasiais, (DNIG), lidera hosi, Genoveva Xavier Correia no Diresaun Nasionál Servisus Kadastrais (DNSC-Sigla Portugés) nian mak Paulino da Cruz*