Venilale- Sekretáriu Estadu Terras Propriedades (SETP) Mario Ximenes, iha loron 9 fulan-Agostu 2019 foin lalais ne’e partisipa iha lansamentu tau fatuk dahuluk ba projetu auto Estrada diresaun Baucau- Venilale no Venilale-Viqueque ho ninia durasaun kosntrusaun tinan 2 ho balu.
Iha lansamentu ne’ebé hetan partisipasaun hosi Ministru Obras Públika, Sekretáriu Estadu Komunikasaun Sosial, ho Sekretáriu Estadu Terras Proriedades ne’e, hetan mós partisipasaun másimu hosi Prezidenti autoridade munisípiu Baucau ho nia estrutura inklui mós lideransa komunitária sira iha Postu Venilale nian.

Antes lansamentu Ministru Obras Públika, Salvador Pires liuhosi ninia intervensaun hateten, Timor-Leste tenke sai pais ida ne’ebé médiu altu, tanba ne’e tenki investe iha area sira hanesan, Infrastrutura, Saude, Edukasaun no Agrikultura.
Ministru ne’e hateten, konstrusaun auto estrada ne’ebé lansa ona hodi tau fatuk dahuluk ne’e ho nia distansia kilometru 58 ho ninia toral orsamentu US$23.853.175,70 ho nia durasaun konstrusaun tinan 2 ho balun.
Ministru ne’e salienta mós, ho kontrusaun estrada ne’ebé maka sei hauu tau fatuk dahuluk ne’e iha futuru sei hadi’a povu sira nia moris sai dignu liutan.
Hanesan membru governu, Salvador husu ba komunidade sira, liu-liu komunidade afetadu sira tenki fó sira nia kontribusaun ba prosesu dezenvolvimentu, tanba ninia benefisiu la’ós ba ema seluk maibé ba timoroan sira rasik.

Iha projetu konstrusaun auto estrada ne’ebé hetan mós apoiu orsamentu hosi Banku Dezenvolvimentu Aziátiku (BDA) ne’e, Sekretáriu Estadu Terras Propriedades (SETP), Mário Ximenes husu ba komunidade sira, liu-liu ba komunidade afetadu sira tenki fó sira nia kontribuisaun hodi labele halo impedementu ba prosesu konstrusaun.
Mario Ximenes mós hateten, konstrusaun auto estrada ne’e importante tebes, tanba ho konstrusaun ne’e bele hamenus mós dezempregu ba timor oan, tanba bele fó kampo servisu ba joven sira.

Hanesan uma na’in Prezidente Autoridade Munisípiu Baucau, António Guterres husu ba lideransa komunitaris sira tenki partisipa nune’e bele fó hatene ba komunidade sira hodi labele halo impedementu ba prosesu konstrusaun no husu mós ba komunidade sira hodi asegura projetu auto estda refere to faze konstrusaun nian remata.
Hanesan baucau oan nia mós husu ba governu ho na’in ba projetu hodi lable lori taballadór sira hosi munisípiu seluk hodi ba halo servisu konstrusaun nian iha fatin refere.*