QUELICAI-Sekretáriu Estadu Terras Propriedades (SETP), Mario Ximenes hamutuk ho Diretór Jerál DGTP iha loron 29 fulan-Outubro 2019 foin lalais ne’e partisipa inagurasaun eskola filiál Uai-tame, Quelicai hodi assina mós deklarasan entrega rai hosi komunidade sira ba Estadu.
Iha serimónia inagurasaun ne’e Sekretáriu Estadu Terras Propriedades (SETP) Mario Ximenes hateten, durante akompaña situasaun hotu iha iha tempo portugés, Indonezia no iha Teritóriu timór laran, istória hanesan ne’e seidauk akontese.
Tanba tuir Membru VIII governu ne’e, durante ne’e ema hotu hatene, komunidade sira entrega rai barak liu ba igreja, maibé ba estadu foin ba dahuluk, ne’ebé komunidade sira hosi suku Uaitame, Postu Administrativu Quelicai, Munisípiu Bacau, entrega rai ba estadu hodi harí edifísiu estadu nian.
“Bainhira ita haree ba tarefa folin rai ninian tuir rezolusaun governu nú. 20/2014 nian liu-liu ba rai sira iha kotuk liu ka iha foho ninia folin mak US$ 3.50 centavos/metru kuadradu, haree ba ida ne’e ita bele hateten, kontribuisaun komunidade sira nian boot tebes hodi harí eskola refere. tanba ne’e, MJ sei hato’o inisiativa komunidade nian ne’e ba iha konsellu Ministru hodi bele hetan apresiasaun hosi membru governu tomak,” tenik Mario Ximenes.

Antes partisipa iha inagurasaun eskola refere, nia parte relata ona situasaun hanesan ne’e ba iha Ministru Justisa, tanba SETP rasik tutela ba iha MJ, tanba ne’e MJ hato’o ninia agradesimentu ba komunidade sira, ne’e hanesan istória foun ba Timor-Leste tanba komunidade sira voluntariamente entrega rai ho nia luan 14.400 metru kuadradu ba iha estadu liuhosi ministériu edukasaun hodi harí eskola ba futuru jerasaun foun sira nian.
Iha fatin hanesan, Vise Ministru Edukasaun Juventude no Desportu, João Zacarias Freitas Soares hateten, lori estadu timor-leste, liu-liu ministériu edukasaun nia naran hakarak hato’o agradesimentu ba komunidade sira ne’ebé oferese rai ho gratuitamente ba estadu. Bainhira komunidade hotu iha timor laran mak ho hanoin ida de’it hodi oferese rai ba estadu hanesan komunidade Uaitame hodi hakbi’it governasaun Timor-Leste.

Hanesan benefisiáriu ba eskola ne’ebé harí ho totál orsamentu ba konstrusaun US$ 82.332,00 ne’e Vise Minsitru ne’e hato’o mós ninia agradesementu ba iha povu Japaun ne’ebé maka fó sira nia apoiu ba timor-leste liu hosi setór edukasaun liu-liu ba konstrusaun uma eskola nian ho nia luan sala sala de aula 3.
Iha Serimónia inagurasaun eskola ho nia luan sala ba aprendiziazen tolu ne’ebé hetan apoiu orsamentu hosi povu Japaun ne’e, Reprejentante Embaixadór Japaun iha Timor-Leste, Shingo Higashimoto hato’o ninia gratindaun profundu ba komunidade suku Uaitame no fundasaun Cailalo ne’ebé konsege imprementa projetu refere to’o remata hodi mellora fasilidade no kualidade edukasaun ba jerasaun foun sira.

“Edukasaun hanesan Savi ba dezenvolvimentu nasaun nian, ambiente edukasaun ne’ebé di’ak no fasilidade edukasaun ne’ebé projetu ne’e fornese bele kondtribui hodi mellora kualidade edukasaun ba estudante sira iha suku refere.” dehan Higashimoto.
Diplomata ne’e husu ba autoridade lokál inklui mós lideransa komunitária inklui komunidade iha suku refere hodi bele tau-matan ba eskola refere hodi bele dura no di’ak nafatin iha tempu naruk nia laran.

Reprezentante komunidade ne’ebé entrega rai ba estadu TL hosi knua Laleia, Celestino freitas Moreira hateten, nia parte ho komunidade sira entega rai ba estadu hodi bele harí eskola ba 2o Ciclo no 3o ciclo ne’e hanesan inisiativa rasik hodi bele hadi’a jerasaun tuir mai sira nia futuru liu hosi edukasaun ne’ebé di’ak.
Iha inagurasaun uma eskola nian ne’e, SETP no Vise MEJD assina mós deklarasaun nu’udár sasin ba entrega rai hosi komunidade sira ba Estadu liu hosi Diretór Jerál ba Diresaun Jerál Terras Propriedades (DGTP)*