Diretor Geral ba Direção Geral dos Serviços de Registos e do Notariado, Dr. Crisogno Neto acompanha husi Diretor DNRNn Dr. João Borges ho Diretor DNICRC, Lic. Victor Neto ensera treinamentu “ On the job training “ faze daruak nian kona-ba prosesu Enrollment ho Handout Passaporte Eletrónico Timor Leste nian ne’ebé partisipa funcionários husi DGSRN no DMCSRN Município ne’en ( Aileu, Ainaro, Covalima, Ermera, Liquiça no Manufahe).



Treinamentu “ On the Job Training “faze daruak nian refere hahú iha loron 15 fulan junho to’o loron 19 fulan junho 2020, ho durasaun óras 40 nian laran.


On the job training hala’o iha fatin atendimentu passaporte nian iha Departamento Passaporte, hahú husi faze inisiu dokumentasaun ka simu dokumentus rekerente nian, halo verifikasaun, insere iha sistema ( enrollment ) no to’o prosesu finalizasaun ka hand out.


Treinamentu refere hetan assisténsia teknika husi Xefe Departamento TI, Sr. Pinso Amado Sei-Sei no Xefe Departamento Passaporte nian Sra. Maria do Céo no funcionários sira iha Departamento de Passaporte nian.


Treinamentu refere, partisipa husi funsionáriu sira husi DGSRN na’in tolu (3) no husi Direção Municípal Conservatoria Serviço de Registo e Notariado nian na’in sanulu-resin-rua (12).



Objetivu husi treinamentu refere, atu hasa’e konesimentu téknika funsionariu sira DGSRN ho DMCSRN Municipal nian kona-ba prosesu enrollment no handout PETL.
Hodi nune’e bele halo atendimentu passaporte iha DGSRN no DMCSRN ho diak tuir regras ne’ebé iha vigor.
Diretor Geral salienta katak, treinamentu ne’e ho tempu badak no hala’o iha situasaun ne’ebé difisil.
Maibe espera katak, ho treinamentu refere, funsionáriu sira hetan ona koinesimentu naton hodi bele halo atendimentu passaporte iha DMCSRN Município ida-idak.


Mesmo que hetan difikuldade oin-oin, sugere ba funcionários sira atu labele tauk husu ka kontatu nafatin mai iha Departamento Passaporte nian atu hetan nafatin assisténsia téknika hodi solusiona problemas ne’ebé ita bo’ot sira enfrenta to’o ita bo’ot sira iha kapasidade rasik hodi halo atendimentu mesak.



Pontus importante ne’ebé DG sublinha mak:


*Kuidadu dokumentus rekerente nian, tenke halo verifikasaun didiak molok prosesa.
*Insere rekerente nian dados ba sistema passaporte tenke ho lolos no akuradu.
*Responsabiliza ba servisu atendimentu nian.


Ikus liu DG SRN agradese ba partisipante sira houtu nebe partisipa ona treinamentu refere ho seriu no diak.


Desejo ba Ita-bo’ot sira houtu, atu koñesimentu tékniku nebe ita bo’ot sira hetan iha fatin ida ne’e bele suporta ita bo’ot sira nian profisaun hodi hala’o kna’ar ho diak iha Ita bo’ot sira nian DMCSRN Município ida-idak.