SEKRETÁRIU - Estadu Terras Propriedades (SETP) Mario Ximenes, iha loron 22 fulan-Jullu 2020 foin lalais ne’e hala’o enkontru ho - Vice-Ministru Komersiu Indústria, (MCI-sigla Portugés) Domingos Lopes Antunes inklui tékniku sira hosi parte DGTP ho MCI nian hodi ko’alia kona-ba parte industria ne’ebé tuir planu sei tau iha parte Maubara munisípiu Liquiça.
Iha enkontru ne’ebé hala’o iha sasaun enkontru MCI nian ne’e SETP, Mario Ximenes liuhosi ninia intervensaun hateten, tuir lolós parke industria ne’e hala’o ona lansamentu primeira pedra, maibé tanba de’it situasaun COVID-19 ne’ebé afeta mundu inklui Timor-Leste ne’e mak halo prosesu tomak atraza.
Ho nune’e nia husu ba entidade hotu atu bele aslera lalais prosesu ba harí parke nasionál ba industria nian ne’ebé mak tuir planu sei tau iha suku Batubou, Postu Administrativu Maubara Munisípiu Liquisa.

Membru governu ne’e informa mós, planu harí parke industria ne’e hetan ona autorizasaun hosi Primeiru Ministru, Taur Matan Ruak, tanba ne’e hanesan membru governu buka meius oinsá atu bele aslera lalais prosesu.
Nia subliña mós, planu governasaun da-waluk nian mak oinsá estadu Timor-Leste tenke iha rendimentu sustentavel. Tanba ne’e parke industria ne’ebé tuir planu sei harí ne’e, parte ida hosi rendimentu sustentavel ne’ebé sei fó apoiu ba Estadu Timor-Leste liuhosi governu.
Nia hateten, polítika governasaun daualuk nian ida mós mak atu absolve traballadór timoroan sira, tanba ne’e mezmu la másimu tuir planu maibé buka oinsá mak hodi bele absolve traballadór, tanba ne’e projetu refere tenki implementa duni iha tempu badak.
Kona-ba levantamentu membru governu ne’e esplika mós, “lei nú.13/2017 kona-bá Regime Espesial para a definição da titularidade dos bens imóveis no lei nú. 8/2017 kona-bá Expropriação por utilidade pública” mak baze legál ida hosi fó kompetensia tomak ba estadu hodi bele utiliza rai estadu ka rai privadu ba interese komum, “tanba ne’e lei fó dalan ona ba ita hodi deside no fó rekoinesimentu ba ita nia sidadaun sira.”

Iha enkontru ne’ebé antes ne’e, iha lorn 26 fulan-Abríl 2019 hala’o ho ekipa sira iha salaun munisípu Liquisa, no loron 1 fulan-Agostu 2019 hala’o iha salaun enkontru MCI nian ne’e SETP husu ba tékniku sira atu halo aprosimasaun ho entidade hotu hodi bele aslera lalais ninia prosesu.
Iha enkontru ne’ebé hetan mós partisipasaun hosi Diretór Jeral Terras Propriedades, Prezidente autoridade Munisípiu Liquiça inklui diretór sira ámbitu MCI nian ne’e Vise-Ministru Comersiu Industria, Domingos Lopes Antunes hateten, projetu ba parke nasionál industria nian tenki implementa, tanba ne’e instituisaun relevante sira hamutuk hodi bele hamosu dekretu governu nian ruma, tanba importante mak investór sir atu mai investe.

Iha fatin hanesan Prezidenti Autodidade Munisípiu Liquisa, Domingos da Concieção do Santos husu ba governu tenki firme iha ninia pozisaun no nia parte sente orgullu ho planu governu nian ne’ebé mak atu harí parke industria iha liquiça.
Nia informa mós, ba rai hirak ne’ebé halo ona aprosimasaun maibé la hetan ninia solusaun hanesan estadu tenki uza ninia ‘pezu do estado’ tuir kontestu estadu nian, bainhira buat hotu presiza aprosimasaun mak la iha solusaun entaun estadu ninia pezu mak ida ne’ebé. Bainhira hanesan protetór povu nian mak la foti medida ruma hanesan mós elemina kompetensia estadu nian sira hotu.*