SETP Hala’o Vizita Urjenti ba DTP Aileu no Manufahi


SEKRETÁRIU - Estadu Terras Propriedades Mario Ximenes, iha loron 10 fulan-Setembru 2020 foin lalais ne’e hala’o vizita urjenti ba Diresaun Terras Propriedades (DTP) Munisípiu Aileu no Munisípiu Manufahi hodi haree servisu funsionáriu sira nian.
Iha vizita urjenti ba munisípiu Aileu no Manufahi ne’e, SETP husu ba funsionáriu sira liu-liu dirijente munisipiu nian sira tenki asegura rai no uma ne’ebé partensia ba estadu, nune’e labele mosu okupasaun ilegál, bainhira iha okupasaun ilegál ba rai ho uma estadu nian ruma husu ba diretór sira atu bee hato’o pedidiu ba iha SETP hodi bele halo despezu administrativu.

Relasiona ho re-estruturasaun ba kargu Diretór Terras Propriedades Munisípiu Bobonaro, Manufahi no Munisípiu Covalima nian, tuir planu SETP ho Diretór Jerál Terras Propriedades sei fó koñesimentu ba iha prezidente autoridade munisíu nian sira.
Durante vizita Membru governu ne’e ba haree mós edifisiu tuan no salaun enkontru ne’ebé lokaliza iha resintu DTP manufahi nian.
Hafoin ba haree edifisiu tuan DTP nian iha manufahi Mario Ximenes hateten, sei tau perioridade ba rehabilitasaun edifisiu refere, tanba ne’e sei tau mós iha planu orsamentu tinan tuir mai.

Hafoin vizita DTP munisípiu Manufahi SETP hala’o mós vizita ba Conservatóriu Rejistu Notáriadu Munisípu Manufahi nian hodi bele haree mós servisu ne’ebé durante ne’e funsionáriu sira iha dirsaun refere hala’o iha munisípiu.
Antes SETP hala’o ninia vizita ba Same Manufahi, nia hala’o mós vizita hanesan ba Diresaun Terras Munisípiu Aileu, no iha vizita ne’e Dirtór Terras Propreidades Munsípiu Aileu, Gaspar de Sá Benevides hato’o mós ninia preokupasaun kona-ba menus rekursu umanu inklui mós presiza kompleta ekipmentu eskritóriu nian no tenki iha kurtiña ba edifisiu nune’e tenki tau mós iha planu ba konstrusaun moru edifisiu nian.

Hafoin vizita SETP nian ba Reprezentante Diretór Dirsaun Terras Propriedade Munisípiu Manufahi, Rosa da Costa hato’o ninia agradesimentu ba SETP tanba bele buka meius hodi vizita Diresaun Terras Munisípiu Manufahi no bele haree diretamente funsionamentu servisu dirsaun nian no atendementu funsionariu sira nian ba komunidade sira iha munisípiu.
Iha biban ne’e Rosa da Costa mós husu ba SETP hodi bele halo manutensaun ba ekipamentu elektónika hanesan komputadór no printer, nune’e husu mós ba SETP atu tau iha planu orsamentu tinan 2021 ba konstrusaun moru iha edifisíu Terras Propriedade nian.
Nune’e uma refere hodi bele utiliza hanesan rezidensia DTP munisípiu nian no bele mós sai hanesa salaun multi-funsaun iha futuru.*

Ananias Babo Horta
Relasaun Públika SETP