DILI, 18 Janeiru 2021, Vise-Ministru Justisa Dr. José Edmundo Caetano, enkontru ho Diretur DNSPRS Sr. Amilcar Soares Seixas, Diretór Estabelesimentu Prizionál Becora Dr. João Domingos, Diretór Estabelesimentu Prizionál Gleno Dr. Nito do Santos no Diretór Estabelesimentu Prizionál Suai Dr. Julio Dias, nomos ekipa teknika planeamentu DNSPRS iha Gabinete VMJ.
Sua Exelénsia Vise-Ministru Justisa Dr. José Edmundo Caetano orienta Diresaun no Diretór Estabelesimentu Prizionál sira halo planu formasaun tanba prizaun iha ekipamentu ne’ebé apoiu husi Governu Japaun liu husi liña kooperasaun servisu entre MJ, UNAFEI no UNDOC.

Iha enkontru ne’e, Vise-Ministru indika Diretór Estabelesimentu Prizionál sira prepara programa no planu atividade formasaun.
Tuir ekipamentu ne’ebé iha, Prizaun Becora sei halo atividade formasaun produs batako, formasaun karpintaria, pedreiru no alfaiate.
Estabelesimentu Prizionál Gleno iha kondisaun atu orienta ba atividade haki’ak animal, produs batako, produs tizolu(batu-bata), kadeira roda, alfaiate, soru tais no halo dosi.

Iha Estabelesimentu Prizionál Suai sei halo formasaun ba produz batako, solda dura, karpinteiru, pedreiru no argrikultura.
Sua Exelénsia Vise-Ministru afirma planu ida ne’e Departamentu Estudu no Formasaun DNSPRS mak sei koordena ho Estabelesimentu Prizionál Becora, Gleno no Suai hodi realiza.