SETP Hala’o Vizita Servisu ba DTP Covalima


COVALIMA-Sekretáriu Estadu Terras e Propriedades (SETP) Mario Ximenes iha loron 23 fulan-Jullu 2021 foin lalais ne’e hala’o vizita servisu ba Diresaun Terras Propriedade (DTP) no Rejistu Notariadu Munisípiu Covalima hodi haree besik-liutan servisu funsionáriu sira nian.
Hafoin vizita SETP marka enkontru ho DTP Covalima ho funsionáriu sira hodi husu ba ba funsionáriu sira iha munisípiu tenki hatudu maturidade servisu ne’ebé di’ak ba komunidade sira, liu-liu bainhira hala’o hela atendimentu públiku.

Membru VIII Governu Constitusionál ne’e mós husu ba Diretór Terras Propriedades foun atu bele kria mós relasaun ne’ebé di’ak entre Diresaun Terras Propriedades Munisípiu Covalima ho Entidade Munissipál sira nian hotu mak eziste iha Munisípiu Covalima.
Iha okaziaun ne’e, Mario Ximenes husu ba Diretór Terras Propriedades ho funsionáriu sira atu bele halo identifikasaun ba rai no uma Estadu sira ne’ebé durante ne’e komunidade sira utiliza illegalmente hodi bele regulariza ho Estadu liuhosi arrendamentu hodi bele hasa’e mós númeru ba arrendamentu nian iha Covalima.

Iha vizita refere Governante ne’e marka mós enkontru ho Administradór Múnisípiu Covalima nian hodi aprezenta Diretór foun DTP nian ba iha Autoridade Munisípiu nian sira.
Iha aprezentasaun diretór foun ba autoridade muniseipiu ne’e, SETP husu ba Administradór Covalima atu bele taumatan ba servisu diretór nian iha Munisípiu, tanba servisu iha munisíu atu la’o ho di’ak liliu iha prosesu atendimentu nian tenki iha mós kordenasaun, koperasaun no kolaborasaun ne’ebé di’ak, nune’e bainhira mosu iregularidade ruma bele rezolve no buka solusaun hamutuk.

Iha fatin hanesan Administradór Munisípiu Covalima, Francisco de Andrade hato’o mós ninia agradesimentu ba SETP ho kometiva, tanba bele aprezenta Diretór foun DTP nian ba iha Autoridade munisipál nian sira hodi bele servisu hamutuk iha futuru.
Administradór ne’e hateten durante ne’e probema rai barak komunidade sira hato’o ba iha autoridade muiseipiu sira, maibé ida ne’e la’ós kompetensia autoridade munisípiu sira nian,
Nune’e mós iha munisípiu refere tuir Administradór ne’e hateten, durante ne’e sidadaun sira barak mak okupa rai estadu no to’o oras ne’e seidauk regulariza ho estadu liu-liu ho DTP munisípiu tanba ne’e, ba oin ho prezensa diretór foun bele buka meisu hodi bele regulariza sira ne’ebé mak okupa rai ho uma estadu.*

Ananias Babo Horta
Relasaun Públika SETP