Sekretáriu Estadu Terras Propriedades (SETP), Jaime Xavier, foin lalais ne’e iha loron 08 fulan-Setembru 2023 ohin hala’o enkontru ho dirijentes iha ámbitu Diresaun Jeral Terras Propriedades nian hodi deskute kona-ba Planu Asaun Annual no Planu Orsamentu ba tinan 2024 nian.
Iha enkontru ho Dirijente sira ámbitu Diresaun Jerál nian ne’e, Sekretáriu Estadu Terras Propriedades (SETP) liu hosi ninia intervensaun hateten, ekontru ne’ebé hala’o ne’e, tanba antes ne’e vizita ona funsionáriu sira iha munisípiu hodi rona no haree direta konsisaun servisu funsionáriu sira nian iha nivel munisípiu.
Tamba iha vizita ne’ebé mak hala’o ba iha munisípiu ne’e, dirijente no funsionáriu sira iha munisípiu hato’o sira nia preokupasaun no sira nia lamentasaun ba servisu sira ne’ebé mak durante ne’e sira hala’o. tanba ne’e mak ohin hala’o enkontru jerál ida ho funsionariu sira hodi bele tau sira nia prekupasaun no hanoin sira ba iha Planu Asaun Annual (PAA) hodi bele tau iha Planu Orsamentu 2024 nian.

Membru IX Governu ne’e husu ba dirijente sira atu bele tau iha planu kona-ba implementasaun ba alargamentu instituisaun Terras Propriedades hodi kria Departamentu 2 iha munisípiu hanesan Departamentu Administrasaun Finansas e Lojístika, Departamentu Arrendamentu
Nia hateten, bainhira Programa desentralizasaun ba iha munisípiu mak realiza iha tinan sira tuirmai, Terras Propriedades presiza aumenta funsionariu kada postu nain rua, hodi bele koresponde ba iha ejijensia komunidade sira nian.
Tuir Jaime, durante ne’e Terras Propriedades hanesan instituisaun ne’ebé Tersera lugár hatama reseita ba iha kaisa estadu, maibé sei menus nafatin forsa traballu inklui fasilidade sira hodi apoiu servisu hanesan transporte no ekipamentu servisu nian inklui ekipamentu eletrónika no ekipamentu eskritóriu nian.

Iha enkontru ho Dirijente no funsionáriu sira ne’e SETP husu ba Tékniku sira iha liu-liu sira ne’ebé iha Diresaun Servisu Terras Propriedades munisípiu nian atu tun ba terenu hodi halo levantamentu ba rai estadu nian sira, nune’e bainhira investór ruma hakarak mai investe, Diresaun Jerál Terras Propriedades nian bele aprezenta ona dadus.
Iha fatin hanesan diretór Jeral Terras Propriedades, Lucas Antonio da Costa hateten, enkontru ne’ebé hala’o durante loron tomak ne’e hodi responde ba prekupasaun no lamentasaun funsionariu sira nian bainhira SETP ba halo vizita servisu ba iha munisípiu sira.

Tuir Lucas, enkontru ne’e hodi bele responde mós kona-ba kalendariu ba Planu Asaun Annual nian no planu Orsamentu 2024 nian ne’ebé elabora ona hosi Ministériu Financas. Ho inisiativa ne’e SETP orienta atu Diresaun Jeral Terras Propriedades bele hahú halo preparsaun. Tanba iha loron 15 fulan-Setembru sei aprezenta planu sira ne’e iha Enkontru Konsultivu Alargadu Ministériu Justisa nian.
Iha enkontru ba Planu Asaun Annual Diresaun Jeral Terras Propriedades nian ne’e hetan partisipasaun hosi Sekretáriu Estadu Terras Propriedades, Diretór Jerál Terras Propriedades, Diretór Nasionál Terras Propriedades, Diretór Nasionál Servisu Kadastrasis, Diretór Nasionál Informasaun no Geoespasial inklui mós Diretór Terras Propriedades munisípiu 12 ho Xefe Departamentu sira ámbitu Diresaun Jerál Terras Propriedades, Sekretáriu Estadu Terras Propriedades.*