Dili-Ministru Justisa Dionisio Babo Soares akompania husi Chefe Gabinete Mateus Rita Soares halo enkontru ho Prezidente Republika Taur Matan Ruak hodi informa lei rai nian no lei Sidadania nian atu nune bele prosesu tuir lei Sidadania ba ema Estranjeiru neé agora dadaun hakarak atu sai sidadaun Timor Leste, enkontru neé halaó iha Palasiu Prezidente Republika Tersa (18/12).

Tuir Ministru Justisa Dionsio Babo hafoin hasoru malu ho Prezidente hateten katak ohin enkontru neé koalia liu kona ba lei rai nian no lei sidadania ba ema estranjeiru neébe hakarak atu sai sidadaun Timor Leste.

“ohin hasoru malu ho Prezidente koalia kona ba lei sidadania, sidadania neébe laos Timor oan liu husi prosesu rua ida mak prosesu atualizasaun no ida seluk mak tenke liu husi Kasamentu ho Timor oan tenke hela iha Timor durante tinan lima nian laran bele sai sidadaun Timorense”dehan Ministru Justisa Dionisio Babo hafoin hasoru malu ho Prezidente Republika Taur Matan Ruak iha loron Tersa Feira (18/12).

Ministru mos esplika liu tan katak Parlamentu Nasional hasai resolusaun barak ona iha tempu uluk relasiona ho atribuisaun nasionalidade hanesan ema neébe luta no apoiu prosesu libertasaun hakarak sai sidadaun Timorense.

Prezidente Republika Taur Matan Ruak mos fo apoiu tamba durante neé nia (Taur) akompania hela lei tamba neé Prezidente Republika husu tenke indentifika didiak saida mak iha laran no saida mak presija atu hadia no mekanizmu saida mak Timor Leste aplika para reforsa diak liu tan iha arkizasaun nasionalidade ba ema liur.