Dili - Atu haklean liu tan konhesimentu jurista Timor oan sira nian (juis, prokurador, investigador sira), inklui jurista sira husi DNAJL-Direcção Nacional de Assessoria Jurídica e Legislação, iha loron Sexta-Sabadu (26-27 Julho 2013) liu ba, iha Centro Formação Jurídica-CFJ, Caicoli, foin organiza formasaun espesializadu ida konaba “Uza Investigasaun Brankamentu Kapital hodi Kombate Korupsaun”. Formasaun ne’e organiza husi Ministério da Justiça (DNAJL no CFJ) ho USAID.

Iha sessaun abertura, ne’ebé loke ofisialmente husi Vice Ministro da Justiça, Sr. Ivo Valente, iha nia diskursu hatete katak, korupsaun sai hanesan inimigu bot ba nasaun ida ne’e. Ho nune’e persiza ema hotu nia kontribuisaun ba luta kontra korupsaun, liu-liu husi parte judicial nian atu hatene didiak oin nusa atu uza instrumentu legal ba luta kontra korupsaun ne’e. Aliende korupsaun, Timor Leste mos hasoru tan ona krime sira seluk ne’ebé kategoria ba trans-crime organizadu hanesan brankamentu capital no finanseiru terorismu. Ho ida ne’e, ita sei hasoru barak liu tan dezafiu iha oin mai. Liu husi formasaun sira hanesan ne’e, sei hakbit liu tan ita nia kapasidade, hanesan ema ne’ebé hakerek lei nomos implementa lei, atu hatene liu tan area ne’ebé atu mosu mai ne’e.
Aleinde Sr. Vice Ministro da Justiça, iha sessaun abertura ne’e mos hetan partisipasaun husi Embaixadora EUA nian, Embaixadora União Europea nomos konvidado sira seluk.

Iha parte seluk, Direitur DNAJL, Sr. Nelinho Vital informa katak :”formasaun ida ne’e importante tebes ba lejislador sira, tamba bele haforsa liu tan lejislador sira nia konhesimentu iha parte krime organizadu transnasional nian, liu-liu atu hare hodi analiza artigu sira ne’ebé hakerek iha lei no decreto lei, ne’ebé sei nakait ba malu. Aleinde ne’e, formasaun ida ne’e, hanesan mos oportunidade ida diak tebes, atu rona esperiensia husi espesialista internasional sira nian, liu-liu iha area droga. Tamba kestaun droga la ses husi brankamentu capital no finansiamentu terorismu, korupsaun, no trafiku humanu”.
Tuir planu, formasaun ida ne’e, sei halo tan iha loron 6 Setembru, 20 Setembru, 4 Outubro no taka iha 11 Outubro.

Orador prinsipal sira mai husi PGR, CAC, Juiz, Defensor Publico, Advogado ne’ebé hetan akompanhamentu husi peritus/espesialita internasional ba kada topiku ne’ebé aprezenta.

@Florindo-DNAJL