SEKRETÁRIU Estadu Terras Propriedades (SETP) iha loron sesta, 14 fulan-Fevereiru 2014 semana liu-ba ho nia ekipa tékniku sira hahuu tau kuadru avisu ba rai no fatin sira ne’ebé maka konsidera estadu nian.

Lansamentu hodi tau kuadru avizu ba rai no fatin estadu nian sira ne’e ho ninia objetivu atu prevene rai estadu labele hetan okupa hosi komuidade sira, lansamentu ba tau kuadru avizu ne’e hahú tau iha tasi-ibun Bidau Santa-Ana, Metiaut, Dolok oan to’o iha tasi-bun hera.

Hafoin lansamentu tau kuadru avizu ne’e, SETP Jaime Xavier Lopes esplika mós, estaka ne’ebé monta ne’e tau deit ba fatin no rai sira ne’ebé maka estadu konsidera rai no fatin ne’e estadu nian. Area tasi-bun iha Dililaran no mós distritu nian sira sei tau hotu kuadru avizu.

Iha kuadru avizu ne’ebé tau iha rai no fatin estadu nian sira ne’e hateten, “Rai ho uma ne’e estadu nian! Tuir Lei No.1/2003 Diresaun Nasionál Terras Propriedades no Servisu Kadastrais maka iha kbi’it atu tau matan, ba sé de’it maka maka okupa la hó autorizasaun sei hasai tuir lei ne’ebé vigór.”

Tau kuadru avisu ne’e tuir SETP, atu proteje ema labele okupa, tanba rai ne’ebé maka iha tasi-ibun estadu Timór-Leste maka administralaiha ema ida okupa rai hirak ne’e tuir nia harak.
Jaime hateten, atu dezenvolve nasaun ne’e, estadu presiza atu tau matan ba area hirak ne’ebé maka estadu nian, ho ida ne’e tuir planu SETP ho nia tékniku sira sei tau hotu kuadru avisu iha tasi ibun sira terirotiu Timor-Leste nian.

Iha lansamentu tau kuadru avisu ne’e hetan partisipasaun hosi Sekretáriu Estadu Terras Propriedade, Diretór Nasionál Terras Propriedades no Servisu Kadastrais, Xefe Departementu Disputa de Terras, Xefe Departementu funsionáriu Floresta, funsionariu sira hosi Meu Ambiente Funsionáriu Estatal inklui mós Xefe Departamentu Administrasaun, Xefe Departamento Registo de Títulos e Disputas de Terra, Xefe Departamentu Cadastro, Informação e Avaliação no Xefe Departamento Administração de Bens Imóveis do Estado inklui mós Membru Polisia Komunitária, Funsionáriu sira hosi Meu Ambiente, no Autoridade lokál hanesan Xefe Suku no Xefe Aldeia.

Iha biban ne’e Xefe Suku Bidau Santa Ana, Francisco de Assis konsidera inisiatia governu nian liu hosi Sekretáriu Estadu Terras Propriedade hodi tau kuadru avisu ba rai no fatin estadu nian sira iha tasi ibun ne’e importante tebes, tanba bele prevene komunidade sira atu okupa rai nia fatin estadu nian sir aiha futuru.