Ainaro , Sub-distritu Hato-Buílico, Vise Ministru Justisa Ivo Valente halo sorumutu ho komunidade sub-distritu Hato-Buílico, iha intervensaun Vise Ministru Justisa sublinha importansia konaba divulgasaun leis inklui konesimentu husi povu Hato-Buílico ba futuro legislasaun ba rai no propriedade, nebe sei iha prosesu aprovasaun.

Explika mos konaba proposta/possibilidade futuro ba lei sira, ba rai nia iha Timor-Leste, nebe tuir realidade prepara ona projektu de lei ba regulariza assuntus konaba dereitu ba rai iha pakote/proposta 3 nebe halao ona iha IV governu konstitusional hanesan:
1. Lei Titularidade
2. Lei Expropeções
3. Lei Fundo Imobiliario.

Transmiti mos konteudo principal lubuk ida ba komunidade, no husu ba komunidade Hato-Buílico atu labele faan rai no hadok-an husi violensia. Direktora DNRN Dra. Fatima de Arauju, explika importansia kriteria halo passaporte no halo pagamentu liu husi banku hanesan BNU, husi direktor DNDHC Dr. Celito Cardoso, explika konaba protesaun ba destamuña.

Sorumutu nee, termina ho agenda pergunta no hataan, nebe mosu pergunta barak liu, konaba direitu ba rai no solusaun ba disputas sira, nasionalidade nebe ema estranjeiru kleur ona hela iha Timor-Leste.

Antes atu taka sorumutu nee, Vise Ministru ba Justisa Ivo Valente fo nia agradesimentu ba povu Hato-Buílico nebe fo nia kbit mai partisipa sorumutu ida nee, no ho nia mensagem ba povu Hato-Buílico, buat nebe ita bot sira rona bele hatóo ba maun alin sira nebe la partisipa iha envento ida nee.

Vise Ministru ba Justisa, Ivo Valente akompanha ho direktor DNDHC, Dr. Celito Cardoso, direktora DNRN Dra. Fatima de Araujo, Administrador Sub-distritu Hato-Buílico Sr. Domingos Lopes, komandante PNTL, Sr. Bento Alves, Amo Parokia Hato-Buílico, Fernando da Silva, SDB, Chefe departementu divulgasaun Sr. Jose Paulino, no ho funsionarius balun husi DNDHC, loron 03 – 04 – 2014.

Vise Ministru Justisa Ivo Valente, ho nia komutiva antes fila mai Dili husi Hato-Buílico, almoso hamutuk ho povu sira iha Hato-Buílico, fila mai Dili 14:25 lokraik.