Diresaun Nasionál ba Direitus Umanus (DNDHC) liu husi Asessor/a ba Direitus Umanus halo In-House Training hodi hasae kapasidade Funsiunariu DNDHC hodi sai hanesan fasilitadór iha futuru.
Programa In-House Training ne’e halao durante loron rua hahú husi 11 no 14 Abril iha Sentru Formasaun Kaikoli Dili.

Molok programa hahú Diretór iha lia maklokek hateten,” Programa In-House training ne’e halao hodi hasae kapasidade ka kuñesementu ba funsiunariu DNDHC relasaun ho atividade diresaun hanesan ba halao divulgasaun iha distritu sira nune mós programa Direitus Umanus atu fasilita treinamentu sira ba komunidade sira iha area rural.”

Núdar Fasilitadór programa ne’e: Asessora ba Direitus Umanus, Maria Rosa Xavier, lori material kona-ba “konseitu baziku direitus umanus,” Asessor ba Planu Asaun Nasionál ba Direitus Umanus (PANDH), Joaozito Viana lori material kona-ba “Teknika fasilita treinamentu: oinsa atu sai fasilitadór diak.”

Matéria ne’ebé hetan durante loron rua hanesan tuir mai: Lei Kontra Violensia Domestika, Konvensaun Direitu ba Labarik, Politika uza forsa, Konvensaun CEDAW, Rezolusaun Konsellu Seguransa artigu 1325 kona-ba Feto Paz no Seguransa no Konvensaun Hasoru Turtura no Tratamentu ka Kastigu Aat sira seluk, Dezumanu no Degradante.