DILI-Sekretariu Estadu Terras Propriedades Jaime Xavier Lopes iha loron 18 fulan-Jullu 2014 foin lalais ne’e hala’o enkontru ho komunidade sira hodi entrega osan ajudu umanitaria ho montante US$ $4.000 ba umakain 8 ne’ebé ofrese hosi MCIA.

Tuir komunidade sira, fatin ne’ebé sira okupa komesa hosi tinan 1999, no halo ona konstrusaun uma permanente no semi permanente, tanba ne’e liuhosi negosiasaun no verifikasaun ne’ebé hala’o hosi ekipa tékniku Terras Propriedade nian sira hodi fó azudu komunitária tuir kondisaun uma idak-idak nian ho valór ne’ebé diferente.

tanba ne’e komunidade sira ejije ba SETP hodi fó valór uma nian hanesan uma semi-permanente ho valór US$ 2.500 ba uma 3, uma permanente ho valór US$3.000 ba uma 3, uma permanente ho valor 3.500 ba uma 1 no uma permanente ho valór 4.000 ba uma 1, ho ida ne’e totál orsamentu US$ 24.000.

Ejijenisa komunidade nian hirak ne’e tuir SETP, sei haree didi’ak, tanba ne’e nia parte seidauk bele foti desizaun ba ejijensia komunidade nian hirak ne’e.

Iha enkontru ne’ebé akompaña hosi Diretor Nasionál Terras Propriedades, Romao Guterres Guterres,no Xefe Departementu sira iha ne’e nian ne’e Jaime husu ba komunidade hodi bele fó sira nia kontribuisaun ba iha dezenvolvimentu.

Nia mós husu ba komunidade afetadu sira tenki hamamuk fatin ne’ebé maka durante ne’e sira okupa, tanba iha tempu badak estadu atu halo konstrusaun ba merkadu.

Jaime husu ba komunidade afetadu sira ne’ebé maka simu apoiu umanitariu ne’e tenki uza ho di’ak, no husu ba sira atu labele okupa tan fatin estadu nian, bainhira sira okupa tan fatin estadu nian iha futuru mai sei halo despezu administrativu e sei la fó buat ida ba sira.

Nune’e mós tuir rezultadu enkontru ne’ebé realiza iha DNTPSC iha loron 17 no loron 18 fulan-Jullu tinan 2014, entre komunidade ne’ebé okupa área Merkadu Taibesi hodi la aseita ho Subsidiu hosi Ministériu Comersiu Industria e Ambiente (MCIA) ho total US$.4.000 ba umakain 8 ne’ebé kada umakain sei hetan US$500.

Iha enkontru ne’ebé hetan mós partisipasaun hosi Xefe Gabinete SETP, Funsionáriu sira hosi MCIA no Xefe Aldeia Taibese ne’e, Maria Jose Fernandes hanesan komunidade ne’ebé simu ajudu umanitariu ne’e hato’o sira nia agradesementu ba iha terras propriedade tanba iha hanoin ne’ebé di’ak hodi bele fó ajudu umanitariu ba sira tuir nesesidade komunidade afetadu sira nian maske la to’o valor ne’ebé maka sira hasai ba halo kontrusaun.

Ananias Babo Horta
Media Officer SETP