DILI-Sekertáriu Estadu Terras e Propriedades, Jaime Xavier Lopes iha loron 12 fulan-Marsu foin lalais ne’e hala’o abertura ba Seminár nasionál ne’ebé Gabinete Inspesaun Auditoria (GIA) MInistériu Justisa (MJ) ne’ebé realiza iha salaun Enkontru Centru Formasaun Juridika (CFJ) Kaikoli, Dili.
Iha Seminár ne’e Jaime liuhosi ninia abertura hateten, hanesan funsionáriu públiku tenke hala’o nia knar tuir regra ne’ebé mak iha tiha ona. Bainhira ministeriu ida atu ba oin presiza ema hotu nia kolaborasaun no kontribuisaun.
Atu hadia mal administrasaun ho mal jestaun iha Ministeriu Justisa nia laran, Diretór ho Jestór sira tenke apoio no servisu hamutuk ho Gabineti Inspesaun Auditoria (GIA) hodi nune’e servisu Ministeriu nian bele la’o ho di’ak.
Relatóriu ne’ebé mak diretór nasional ho distritais sira atu hato’o ba Ministru tenke aprezenta mós ba iha GIA, para nune’e sira bele audit lai mak fo ba Ministru hodi nune’e labele hamosu mal jesatun no administrasaun nia iha ministeriu nia laran.

Tuir Jaime, liu hosi Seminár ne’e importante hodi avalia servisu iha MJ nian no mós hodi aprezenta fali sira nia auditoria inspesaun nian hodi fó hanoin fali ba diretór nasionál ho distritais no mós funsionáriu sira hodi labele halo mal administrasaun para labele lori ministeriu nee ba risku.
Jaime mós husu ba diretór sira hotu atu fó suporta ba GIA hodi hala’o inspesaun ba iha diresaun sira, atu nune’e labele hamosu diskonfia malu, maibé tenke lori konfiansa ba malu, nune’e hotu-hotu bele servisu hamutuk hodi lori ministeriu ne’e ba oin.
“Ita tenke iha fuan no interese hodi taumatan ba ministeriu ida ne’e. Para nune’e ema tama mai bele konsidera katak ita nia ministeriu ne’e hala’o servisu ho di’ak. Tanba ne’e ita tenke tau matan ba ita nia ministeriu hanesan uma kain ida, ita tenke servisu ho fuan, para ministériu ne’e la’o ho di’ak, ita tenke fo suporta ba GIA , para bele hala’o servisu ho di’ak. Persiza kolaborasaun hamutuk iha ministériu ida nia laran,” dehan Jaime.

Iha fatin hanesan, Inspektur Jerál Ministáriu Justisa, Lucas Antonio da Costa hatete, Seminár ne’e atu avalia servisu no Jestaun administrasaun nian iha 2014 liu ba parabele hadia fali kualidade servisu iha 2016 mai. Nune’e aprezenta mós rejultadu atividades ne’ebé hala’o tiha iha 2014 hodi fo hanoin fali ba dirijente hodi avalia fali servisu ne’ebé la’o la di’ak hodi hadia fali iha futuru.
Tuir nia liu hosi aprezentasuan ne’e hodi bele fohanoin fali ba funsionáriu sira kona-ba buat ida mal administrasaun nian no hadia frakeza ne’ebé mak iha ona.
Lucas Salienta mós Seminár ne’e hodi bele promove kultura ba ministeriu nian hodi luta hasoru korupsaun iha administrasaun ministeriu justisa nian, Seminár ne’e diskute no troka mos ideias ba servisu ne’ebé hala’o iha 2014 hodi avalia fali ba tinan ne’e ho tinan 2016 mai.
Iha fatain hanesan Diretur Geral, Hendrique de Oliveira Ximenes hatete, atu hadia mal administrasaun no euro ne’ebé ministeriu ne’e hasoru, jestór sira tenke hasa’e kualidade servisu ba iha 2016.*
Ananias Babo Horta
Media Officer SETP