Ministériu Justisa liu husi diresaun Nasionál Direitus Umanus no Sidadania (DNDHC) ho Diresaun Nasionál Rejistu Notariadu (DNRN) halo programa divulgasaun lei iha suku Cairui Postu Administrativu Laleia Munisipiu Manatuto, iha loron 17 fulan Marsu tinan 2015.

Xefe suku Cairui, João Susu Ximenes ne’ebé representa Administratór Postu Laleia iha abertura hateten,”iha suku Cairui ne’e ho total populasaun iha uma kain atus tolu resin (300) ne’ebé maioria agrikultór ne’ebé ohin partisipa iha sorumutu ne’e atu bele tau atensuan didiak hodi rona lei sira ne’ebé husi Ministériu Justisa mai hato’o ba ita, nune’e atu labele halo fali hanesan buat halimar maibe tenke aproveita tempu ida ne’e ho didiak.”

Diretór DNDHC, Celito Cardoso iha lia maklok hateten,”ohin Ministériu Justisa liu husi Diresaun Nasionál Direitus Umanus no Sidadania ho Diresaun Nasionál Rejistu Notariadu, mai iha suku Cairui hodi halao divulgasaun lei, ida ne’e ba dahuluk (primeira vez) Ministériu Justisa divulga lei to’o iha suku. Tinan tinan ami halao programa hanesan ne’e maibe halao iha Munisipal no postu administrativu, maibe ohin halo divulgasaun iha Cairui tanba komunidade iha Cairui mós iha direitu hanesan ho ema hotu hotu iha Timór laran tomak.”

Iha programa divulgasaun ne’e Diretora Diresaun Nasionál Rejistu Notariadu, Maria de Fátima iha apresentasaun hateten,”governu Timór-Leste proteje sidadaun hotu hotu nia direitu liu husi dokumentu. Kualker sidadaun tenke iha identidade sivíl hanesan; Billete Identidade (BI), Sertidaun moris( sertidaun RDTL), sertidaun mate (Sertidaun Óbitu), sertidaun kazamentu no dokumnetu sira seluk ne’ebé ita presiza.”

Relasaun ho oinsa atu hetan sidadania nu’udar timoroan, komunidade Cairui apresenta sidadaun balun ne’ebé mai husi Indonesia no hela iha suku Cairui hahuu husi tinan 1984 to’o agora sai tiha ona funsiunariu públika (Profesór eskola Primaria) maibe seidauk hetan sidadania nu’udar ema timoroan.

Diretora Fátima esplika tan,”tanba komunidade sira la hatene informasaun kona-ba asesu ba dokumentu inklui sidadaun rai seluk hakarak atu sai sidadaun Timór-Leste, la hetan informasaun ne’e mak ohin Ministériu Justisa liu husi diresaun DNDHC no DNRN mai iha suku Cairui hodi divulga informasaun ba komunidade atu hatene hodi bele asesu ba iha edifisiu Rejistu Notariadu. Dokumentu sira ne’ebé seidauk bele trata iha munisipiu Manatuto bele ba trata iha Baucau ka bele ba diretamente iha Dili, ezemplu hanesan atu trata Billete Identidade.”

Komunidade ne’ebé partisipa iha programa divulgasaun ne’e nakonu iha edifisiu sede suku Cairui ne’e inklui xefe suku Cairui ho ninia komunidade maske administradór Postu la marka presenza maibe akompañadu ho komandante PNTL skuadra Lalaeia.

João Maupelo da Costa
Ofisiál Relasaun Públika