Dili - CFJ, loron 25 fulan-Marsu 2015, Ministru Justisa Ivo Valente ensera Workshop Diresaun Jerál Ministériu Justisa kona-ba, “Planeamentu ne’ebé diak sei hasa’e kualidade ezekusaun atividade no efisiénsia iha finansiamentu.” Workshop ida ne’e hala’o durante loron-tolu, hahu iha loron 23 - 25 Marsu 2015 iha Sentru Formasaun Jurídika (CFJ) Kaikoli, Dili.

Workshop durante loron-tolu ne’e hau akompaña, maske hau laiha tanba tuir aprezentasaun Programa VI Governu Konstitusionál iha Parlamentu Nasionál, maibe hau hatene prosesu tomak tanba Diretór-Jerál sempre informa mai hau kona-ba progressu diskusaun, no mós idéias no opiniaun mak la’o iha ne’e.

Programa no atividade hotu-hotu ne’ebé ita-bót sira diskute loron hirak ne’e mesak Ministériu Justisa nia prioridade, maibe ita-bót sira tenke hare’e uluk prioridade prinsipál sira.

Ita tenke tuir nafatin ita-nia Planu Estratéjiku Setór Justisa (PESJ) nian, katak planu estratéjiku mak sai matadalan ba ita-nia programa no atividade, PESJ mak fó biban mai ita atu konsidera “prioridade das prioridades” wainhira koloka prioridade-sira no ajusta iha ita-nia planu programa no orsamentu tinan-tinan; hateten Ministru Justisa Ivo Valente wainhira fó nia intervensaun dahuluk hodi ensera workshop ne’ebé hala’o hosi Gabinete Diretór-Jeral Ministériu Justisa.

Ivo Valente hateten, “Hau kontente hodi mai hasoru imi-hotu iha ne’e, hau hatene iha loron-tolu nia laran ne’e, ita-bót sira halo esforsu maka’as tebes iha momentu ne’ebé oportunu no importante ba Ministériu Justisa nian hodi hakat liután ba passu ida iha tinan 2015 ne’e no mós planu ba iha tinan 2016 tuir mai.

Ita tenke reduz kustu ne’ebé ladun presiza, polítika poupansa tenke la’o nafatin, por ezemplu, ita komesa hapara snack no hahan ba atividade sira, tenke kontrolla uzu kombustivél ho rigor liután, no sel-seluk. Ho polítika poupansa VI Governu Konstitusionál ne’ebé mak halo esforsu dadaun ne’e atu reduz despeza-sira mak ladun presiza, hodi nune’e bele aloka ba iha programa ne’ebé fó benefisiu ba ema barak liután.

Iha fatin hanesan, Diretór-Jerál Henrique de Oliveira Ximenes hateten, workshop ne’e nu’udar realizasaun hosi despacho S. E. Señor Ministru Justisa nian hodi halibur kargu-xéfia Ministériu Justisa nian, tantu nasionál no nivél munisípiu hodi diskute no halo ajustamentu ba Planu Asaun Anuál (PAA) 2015, inklui mós halo planu ba 2016.

Ami halo ona ajustamentu ba indikadóriu-sira tuir Planu Estratéjiku Setór Justisa (PESJ) nian, Aumenta Henrique de Oliveira Ximenes.

Hau mós hakarak informa ba Señor Ministru katak, workshop durante loron-tolu ne’e diak tebes tanba hetan partisipasaun masimu hosi Diretór Nasionál no Diretór Munisípiu sira, no ami konsege produz dokumentu ba Programa Indikadóriu Dezempeñu 2015 hodi nune’e sei hetan asina hosi diretór-sira hotu no sei hato’o ba Ministru Justisa no SETP atu aprova hodi nune’e ami sei lori ba iha implementasaun, aumenta Diretór-Jerál.

Workshop ne’e taka iha tuku 18:20 lokoraik, hafoin Ministru Justisa Ivo Valente aprova Dokumentu Programa Indikadóriu Dezempeñu 2015 ne’ebé asina hosi Diretór-Jerál, Inspetór-Jeral, Defensór-Públiku Jeral, Diretór PSIK no Diretór Nasionál Sira.