DILI – Ministru Justisa Ivo Valente prezide reuniaun Estra-Ordináriu Konsellu Koordenasaun Justisa (KKJ). Reuniaun ne’e Ministru Justisa konvida reprezentante Sekretáriu Jeral das Nações Unidas iha Timor-Leste Knut Ostby hodi halo aprezentasaun apoiu Programa das Nações Unidas para o Desenvolvimentu (PNUD) ba setór justisa tinan 2015-2018 iha Salaun Ministériu Justisa, loron 27 fulan-Abril 2015.

Ministru Justisa Ivo Valente iha nia abertura reuniaun ne’e hateten, hau konvida PNUD mai iha reuniaun ne’e atu nune’e membru Konsellu Koordenasaun Justisa (KKJ) bele rona no diskute posibilidade apoiu PNUD nian ba iha setór justisa.

“Ita-hotu hatene katak, apoiu PNUD importante no engloba setór justisa tomak nia servisu, tantu Tribunál Rekursu, Ministériu Públiku, Defensoria Públiku Jeral, advogadu sira no mós Polísia,” aumenta Ivo Valente.

Iha ajenda lubuk ida mak ita-hotu atu diskute iha reuniaun Estra-Ordináriu Konsellu Koordenasaun ne’e, maibé depois-de reuniaun ida ne’e termina, ita sei diskute asuntu importante sira tuir mai.

Ne’ebé oportunidade ida ne’e di’ak tebes, hodi rona posibilidade apoiu, “oinsá” PNUD engloba apoiu sira ba iha setór justisa, hodi nune’e bele hari’i kuadru judisiáriu ne’ebé di’ak ba Timor-Leste iha futuru; hateten Ministru Justisa wainhira atu fó tempu ba PNUD hodi halo aprezentasaun.

PNUD halo introdusaun programa no atividade apoiu sira iha setór justisa ba iha tinan 4 oin mai. Depois-de aprezentasaun, Ministru Justisa loke oportunidade ba membru KKJ mak hanesan,

Presidente Tribunal Rekursu Guihermino da Silva, Prokuradór Geral da Repúblika Jose Ximenes, Defensór Públiku Geral Sergio Hornai, Diretór Nasionál PCIC Herminegildo da Cruz, Diretora Sentru Formasaun Jurídika Marcelina da Silva, Presidente Advogadu Privadu (AATL) Paulo Remedies. Prosesu apresiasaun hosi membru KKJ hatudu katak, instituisaun justisa tomak fó sira-nia agradesimentu ba PNUD nia apoiu.

Hodi termina reuniaun ne’e, Ministru Justisa Ivo Valente hato’o nia agradesimentu ba PNUD iha Timor-Leste. Hau sei koa’lia ho membru KKJ ba planu oi-oin setór justisa nian, apoiu posivél sira,

agradese mós PNUD nia kooperasaun ho Governu durante iha tinan barak nia laran, susesu lubun ne’ebé ita atinzi ona, hatudu susesu no esforsu maka’as hosi PNUD mai iha ámbitu instituisaun setór justisa tomak.

Reunian ne’e, além-de partisipa hosi membru Konsellu Koordenasaun Justisa, partisipa mós ekipa ida hosi PNUD iha Timor-Leste ne’ebé lidera hosi Knut Ostby, mak hanesan Dr. Faustino Cardoso (PNUD), João Pereira (Adjuntu Diretór do Pais para assunto de Governação do PNUD), Ahmad Salari (Chefe Programa da Justiça do PNUD).