DILI – CFJ, Ministru Justisa Ivo Valente hamutuk ho Presidente Komisaun Funsaun Publiku (KFP) Eng. Riborio Pereira, hala’o serimónia fó-posse ba daruak iha tinan 2015 ba kargu Diretór nain-hat no kargu xéfia departementu nain-sanulu iha ámbitu Ministeriu Justisa. Seremónia fó-posse ne’e hala’o iha Sentru Formasaun Jurídika (CFJ), loron 28 fulan-Abril 2015.

Hamutuk kargu-xéfia nain sanulu resin-hat mak simu-posse; Maria Fatima de Araújo nu’udar Diretora ba Diresaun Nasionál Rejistu Notariadu (DNRN), Jaime Maia nu’udar Sub-Inspetór (GIA), Nelinho Vital nu’udar Diretór ba Diresaun Nasionál Jurídiku no Legislasaun (DNJL), Helder Belo nu’udar Diretór ba Diresaun Nasionál

Prisionais no Reinsérsaun Sosiál (DNSPRS), Isolino Marques nu’udar Xéfi Departementu Planeamentu Diresaun Nasionál Administrasaun Finansas (DNAF), Carmen Soares nu’udar Xéfi Departementu Finansas DNAF, Maximiano Fernandes nu’udar Xéfi Departementu Administrasaun Arquiva DNJL, Pascoal da Costa Soares nu’udar Xéfi Departementu Polítika Legislasaun DNJL, Francisco Xavier Vasco Soares nu’udar Xéfi Departementu Direitus Umanus no Planu Asaun Nasionál Direitus Umanus DNDHC, Flaviano Moniz Leão nu’udar Xéfi Departementu Tratados Internacional e Monitorizasaun DNDHC, Venancio da Costa Monteiro nu’udar Xéfi Departementu Apoiu Tékniku Jurídiku GIA, Luisa Olandina Soares nu’udar Xéfi Departementu Finansas GIA, Juliana Fatima Gama nu’udar Xéfi Departementu Inspesaun e Investigasaun GIA, Elvio Marciano de Deus Soriano nu’udar Xéfi Departementu Fiskalizasaun e Auditoria GIA.

Ministru Justisa Ivo Valente iha nia diskursu fó-posse hateten, em prinsipiu kargu sira ne’ebé mak ita bot sira assume agora reflete apresiasaun hosi Ministériu Justisa nian ba ita-bo’ot sira-nia profissionalismu no dedikasaun tomak.

Prosesu naruk tebes wainhira eskolla ita bo’ot sira, liu hosi avaliasaun dezenpeñu, sukát ita-bo’ot sira-nia kapasidade tékniku, etika no profissionalismu ne’ebé enkamiña hosi ita bo’ot sira-nia superiór sira, no avaliasaun ba ita bo’ot sira hatudu di’ak tebes, ne’eduni hau eskolla ita bo’ot sira tanba merese duni atu assume pozisaun hirak ne’e.

Ohin ita-bo’ot sira simu kna’ar ida ne’ebé presiza responsabilidade bo’ot tebes, todan iha ita-nia kaba’as tanba ema barak sei hakilar Ministériu Justisa, tanba falta atendimentu ne’ebé diak no falta profssionalismu.

Hare’e ba kestaun ne’e, signifika katak avaliasaun laós de’it mai hosi ita bo’ot sira-nia superiór sira, maibé avaliasaun mai mós hosi ita-nia komunidade sira.

Nune’e, komporta oinsá mak hadi’ak atendimentu ba komunidade sira, oinsá sira presiza ita-nia tulun, no hau husu ba imi atu labele halo diskriminasaun ba ita-nia komunidade sira; aumenta Ministru Justisa Ivo Valente.

Ministru Justisa hateten tán katak, frankamente hau tenke dehan ba imi-hotu, sei akontese diskriminasaun wainhira halo atendimentu públiku ba ita-nia komunidade sira wainhira sira trata passaporte no BI; hau simu keisa no reklamasaun balun, ne’e labele akontese tán.

Ita-bo’ot sira tenke servisu tuir job-discriptions mak iha ona, preofissional, kreativu no inisiativa hodi buka solusaun ba problema ne’ebé ita-bo’ot sira infrenta, tanba intervensaun superiór mak ultimu rekursu.

Hodi hakótu ninia diskursu, Ministru Justisa hateten, hau fó parabens ba ita bo’ot sira-hotu, parabéns mós ba imi-nia família tomak tanba direitamente no indireitamente fó ona apoiu ba imi-nia kna’ar iha Ministériu Justisa, hau fiar ita hotu sei hamutuk hodi hadi’ak diak liután setór justisa tuir espetativa povu Timor-Leste.

Iha fatin hanesan Presidente Komisaun Funsaun Públiku (KFP), Eng. Liborio Pereira kongratula no apresia tanba lori KFP hodi fó-posse ba kargu-xéfia Ministériu Justisa. Nia haktuir katak, hanesan funsionáriu públiku tenke kustume án atu simu orientasaun no hala’o ordem, la-presiza atu ema ida hatudu mak foin hala’o nia kna’ar.

Ministériu Justisa hanesan órgaun Governu ne’ebé mak iha ninia ámbitu kna’ar iha relasaun mós ho povu, tanba-ne’e, ejiji funsionáriu sira nia pasiénsia no dedikasaun.

Ema barak presiza ita-nia servisu, hanesan lideransa tenke sai inspiradór ba hahalok di’ak, hodi nune’e bele atinzi objetivu Planu Asaun Anuál Ministériu Justisa ne’ebé mak trasa ona.

Tanba-ne’e, funsionáriu públiku tenke hatudu ninia autonomia, matenek, kbi’it no badaen nune’e sai solusaun ba problema sira mak Ministériu Justisa hasoru; aumenta Presidente KFP, Eng. Liboria Pereira.