DILI – Kuarta-Feira, loron 13 fulan-Maiu 2015, Ministru Justisa Ivo Valente prezide reuniaun Konsellu Konsultivu (KK) Ministériu Justisa ne’ebé mak partisipa hosi directores nacionais, no servisu administrativa direita no mós administrativa indireita Ministériu Justisa nian.

Reuniaun KK nu’udar espasu konsultivu ida ba assuntu sira mak relasaun ho servisu internál Ministériu Justisa nian; espasu atu fahe informasaun ba malu kona-ba progressu implementasaun planu, buka rezolusaun ba obstakulu no dezafiu sira, halo avaliasaun, formula planu global no sel-seluk tán.

Iha abertura reuniaun, Ministru Justisa Ivo Valente hateten, ita-hotu tenke fó atensaun ba yellow-road, ne’e ajenda importante hodi koa’lia planu 2016 nian, tanba-ne’e, hau husu ita-bo’ot sira hotu atu komesa prepara ona prioridade prinsipál kada diresaun ida-idak nian; ita-bo’ot sira tenke halo planu prioridade ne’ebé positivamente fó benefísiu ba ema barak nia moris, no hau sei lori ba Konsellu Ministru hodi aprezenta iha ne’ebá.

Ajenda tuir mai mak, ho komprimissu VI Governu Konstitusionál ba programa 100 diaz nian, hau husu ba Diresaun Jerál atu submete ona relatóriu ba iha Gabinete Primeiru-Ministru antes loron 16 Maiu 2015. Saída mak tenke relata? Ita iha liña formatu ida atu reporta planu 100 diaz nian, hela ita relata tán ita-nia planu, no “sá” rezultadu mak ita atinzi tiha ona; esplika Ministru Justisa Ivo Valente.

Atravez diskute planu ba tinan 2016 nian hodi lori ba programa yellow-road, Ministru Justisa loke ba diskusaun avaliasaun atividade kada diresaun ida-idak iha ámbitu Ministériu Justisa nian ba atividade fulan-Abril 2015; planu “saída” de’it, “saída” mak hala’o ona, sucsessu sira, obstakulu nu’udar dezafiu no meta mak atinzi ona.

Reuniaun KK Ministériu Justisa hahu tuku 10:00 dadersan no termina iha tuku 02:30 lokoraik.