DILI – Kinta-Feira, loron 14 fulan-Maiu 2015, Ministru Justisa Ivo Valente abertura Semináriu Nasionál ne’ebé mak hala’o hosi Polísia Sientífika Investigasaun Kriminál (PSIK) ho tema sentrál; “ezisténsia PSIK atu hases dezafiu paíz nian hosi dezenvolvimentu sosio-ekonómiku ne’ebé hamosu kriminalidade organizadu, modernizadu, graves no kompleksu,” iha Salaun Konferénsia Ministériu Solidaredade Sosiál.

Semináriu Nasionál ne’e mós atu komemora tinan-dahuluk ezisténsia PSIK, hodi loke espasu ba haksesuk ideia sira, fahe esperiénsia, preokupasaun no define estratéjia hodi nune’e lori ba dezenvolvimentu PSIK iha futuru.

Ministru Justisa iha abertura hateten, hau fó hau-nia sinseru parabéns no votu susesu bo’ot ba Diretór Nasionál no restante Korpu Pesoál PSIK nian ne’ebé mak maske polísia kriminál sei joven maibé ho imajen ne’ebé morin no exelénte, ohin, ita-hotu iha ne’e bele orgullu.

Hanesan órgaun ausiliár ba administrasaun di’ak justisa kriminál ho kna’ar hodi kombate kmininalidade kompleksa, grave no organizada, hein katak bele sai preponderante iha kontestu ohin-loron ba dezenvolvimentu iha ita-nia paíz doben ida-ne’e.

Maske sei iha buat barak mak sei falta, ita hasoru kestaun lojístiku no rekursu umanus tanba PSIK sei jovens hela, maibé hau kompremente katak, buat hotu ita sei ultra passa, ne’e nu’udar lalaok normál kresimentu dezenvolvimentu instituisaun nian; esplika Ministru Justisa Ivo Valente.

Depoiz abertura hosi Ministru Justisa, hahu halo ona aprezentasaun hosi oradór nain-tolu mak hanesan, Diretór PSIK Dr. Hermenegildo da Cruz, Reitór UNTL Dr. Aurelio Guterres, P.hD. no Dr. Aniceto Guterres hosi Komisaun A Parlamentu Nasionál. Prosesu aprezentasaun no diskusaun modera hosi Dr. Jose Neves, Adjuntu Komisáriu KAK.