PRIZAUN GLENO, ERMERA – Sesta-Feira, loron 15 fulan-Maiu 2015, tuku 01:00 lokoraik S.E. Ministru Justisa Ivo Valente halo vizita ba Prizaun Gleno Munisípiu Ermera, no iha tempu mak hanesan, halo mós enseramentu ba jogu ba rekluzu sira/ prizioneiru sira iha Prizaun Gleno ne’ebé mak hahu ona hosi loron 08 fulan-Maiu 2015. Jogu rekluzu ne’e atu Komemora Loron Restaurasaun Independénsia Timor-Leste ba dala XIII.

Iha ninia intervensaun, Ministru Justisa Ivo Valente hateten, Estadu Timor-Leste fó mós importansia ba rekluzu ka prizioneiru sira, ba prizioneiru Timor-oan ka laós sidadaun Timor-Leste. Tanba, imi-hotu iha direitu atu hetan defeza, hetan direitu ba saúde di’ak, divertimentu maske limitadu tebes, ho nune, wainhira imi hetan ona liberdade no fila ba iha komunidade nia le’et bele kontribui mós ba dezenvolvimentu nasionál.

Aliende ohin ha’u-nia vizita, hau hakarak hateten ba imi-hotu katak, ohin, loron 15 fulan-Maiu nu’udar Loron Internasionál Familia nian, loron ne’e, komemora loron familia iha mundu tomak, ha’u dehan ba imi, “familia mak hun hosi nasaun, tanba-ne’e, tenke kuida di’ak ita-nia familia, ho nune’e mak ita-nia nasaun bele mós la’o di’ak ba oin. Ha’u mai vizita imi hanesan imi-nia familia ida hodi hare’e imi-nia kondisaun no koa’lia ho imi;” espresaun sentidu solidaredade hosi Ministru Justisa.

Iha biban ne’e, Ministru Justisa fó mós agradesimentu b’o’ot ba ONG Caritas Australia ne’ebé mak fó ona tulun ba Ministériu Justisa iha tinan barak nia laran, hahu kedan tinan 2006 ba área prizaun, no ohin, vizita ne’e mós atu rona no hare’e atividade prizioneiru sira ne’ebé hetan apoiu hosi Caritas Australia hodi komemora Loron Restaurasaun Independénsia Timor-Leste ba dala XIII. Jogus ne’e hala’o iha Prizaun Gleno Ermera, jogu konkore entre bloku ka sela prizaun mak hanesan; futsál, ténis meza no voleiból.

Imi tenke hadia no hatudu imi-nia komportamentu di’ak, abitua ho hahalok di’ak durante iha prizaun nia laran, ho hahalok imi-nian mak bele justifika katak bele lori hikas imi ba iha sosiedade nia le’et ka la’e. Tanba-ne’e, Estadu Timor-Leste liu hosi S.E. Presidente-Repúblika iha kompeténsia masimu hodi fó indultu no hatu’un imi-nia pena, ne’e hotu depende ba imi-nia komportamentu; enkoraja Ministru Justisa Ivo Valente.

Iha fatin hanesan, Defensór Públiku Jeral Sergio Hornai hateten, tinan-tinan, Diretór Prizaun manda relatóriu avaliasaun kada prizioneiru ida-idak iha Timor-Leste tomak ba ha’u, no hato’o ba Señor Ministru Justisa no mós ba ita-nia Presidente-Repúblika, relatóriu avaliasaun ita-bo’ot sira-nia komportamentu. Bazeia ba avaliasaun lor-loron nian, nain-ulun sira sei foti medida polítika ba ita-bo’ot sira tuir ita-nia Konstituisaun RDTL haruka.

Iha vizita ne’e, Ministru Justisa ne’ebé akompañadu hosi Diretór Nasionál Prizaun no Reinsersaun Sosiál, Defensór Públiku Jeral, Inspetór Jeral Ministériu Justisa, Administradór Munisípiu Ermera, Xéfi Gabinete Ministru Justisa no Diretór Prizaun Gleno halo dialogu ho prizioneiru sira, no mós entrega instrumentu divertimentu no disportu ba manan nain sira ne’ebé mak kompete iha jogu.

Molok remata, Ministru Justisa Ivo Valente kafé hamutuk ho prizioneiru sira. Komutiva Ministru Justisa fila hikas ba Dili iha tuku 03:27 lokoraik.