PRIZAUN BEKORA, DILI – Sesta-Feira, loron 29 fulan-Maiu 2015, Ministru Justisa Ivo Valente halo vizita ba Prizaun Becora, Munisípiu Dili, iha tempu hanesan, Ministru Justisa halo mós enseramentu ba jogu rekluzu/ prizioneiru sira ne’ebé mak hahu kedan ona hosi loron 12 fulan-Maiu, no remata iha loron 29 fulan-Maiu hodi Komemora Loron Restaurasaun Independénsia Timor-Leste ba dala XIII.

Iha ninia intervensaun Ministru Justisa Ivo Valente fó agradesimentu bo’ot ba ONG Caritas Australia ne’ebé mak fó ona tulun ba Governu, liu hosi Ministériu Justisa, iha ne’e, iha Prizaun Becora ita organiza ona eventu ba jogu rekluzu, jogu hanesan ne’ebé mós hala’o ona iha Prizaun Gleno Ermera.

Hanesan governante ida, responsavél masimu Ministériu Justisa nian, ha’u agradese no hato’o obrigadu barak ba apoiu hirak ne’e.

Loron 20 fulan-Maiu nu’udar Loron Liberdade, loron ne’ebé importante ba timor-oan ida-idak iha nia vida tomak, loron ba direitu umanu timor-oan nian; tanba-ne’e, loron ne’e importante atu ita-bo’ot sira halo reflesaun, hanesan mós loron bo’ot seluk mak sempre ita komemora, tenke halo reflesaun beibeik ba sakrifísiu herói sira mak fó án mate ba nasaun ne’e, hodi nune’e ita valoriza ukun án ho di’ak ho servisu pozitivu sira.

Ha’u dehan ba imi-hotu, paiz independénsia, demokrátiku no liberdade sempre iha nia regras atu la’o tuir, hanesan mós Timor-Leste, maske ita nasaun demokrátiku maibé ema-hotu tenke la’o tuir lei; hateten Ministru Justisa.

Ministru Justisa Ivo Valente hatutan, Ita-bo’ot sira mós iha liberdade maibé liberdade ne’ebé limitadu, la hanesan ho maluk sira mak hela iha liur; imi hetan direitu ba saúde, moris, han no roupa wainhira sei kumpri pena ne’ebé ita-bo’ot sira simu. Ha’u dehan mós ba imi, tinan-tinan Diretór Prizaun manda relatóriu avaliasaun prizioneiru ida-idak iha Timor-Leste tomak mai ha’u, no mós ba iha ita-nia Presidente-Republika, relatóriu avaliasaun ita-bo’ot sira-nia hahalok ka komportamentu.

Ho avaliasaun lor-loron nian, ita-bo’ot sira bele hetan komutasaun nune’e bele hatu’un tinan pena nian. Tanba-ne’e, ita-bo’ot sira uza oportunidade ida ne’e hodi aprende buat barak, hadia imi-nia hahalok nune’e wainhira hetan ona liberdade no fila hikas ba komunidade nia le’et bele kontribui mós ba iha dezenvolvimentu ita-nia nasaun.

Ha’u husu atu iha kompetisaun tuir mai, halo kompetisaun muzika ka festivál arte tanba ha’u hare’e ohin imi kanta no toka kapa’as tebes, ho talentu mak imi iha bele produz ba CD hodi fa’an, osan ne’ebé ita-bo’ot sira sei hetan bele fó ba imi-nia familia; enkoraja Ministru Justisa Ivo Valente.

Ikus liu Ministru Justisa entrega premiu ba manan-nain sira ba jogu ne’ebé konkore mak hanesan; futsál, tenis meza, catur no voleiból. Manan-nain ba jogu futsál mak, primeiru lugar hosi Bloku A, segundu lugar Bloku E no terseiru lugar Bloku G.

Vizita Prizaun Becora; Ministru Justisa Ivo Valente akompaña hosi Diretór Nasionál Prizaun no Reinsersaun Sosiál Helder Belo, Xéfi Gabinete Ministru Justisa Evangelino Belo, reprezentante ONG Caritas Australia iha Timor-Leste Francisco da Cunha no membru sosiedade sivíl balun.