DILI - Sesta-Feira, loron 29 fulan-Maiu 2015, Ministru Justisa Ivo Valente reprezenta Governu RDTL asina kontratu-promesa ho Administradór Bernardo Correia Barrada hosi Heineken Timor, S.A. iha Ministériu Justisa.

Asina kontratu-promesa ne’e hodi hádalan komitmentu ba kontratu fixu ba serimónia asina kontratu arendamentu propriedade estadu ba Kompañia Heineken ne’ebé mak sei hala’o iha loron 29 Juñu 2015 (fulan oin mai) hodi halo ezekusaun ba Akordu Espesiál Investimentu entre Timor-Leste ho Heineken Timor, S.A. tuir Rezolusaun Governu Nú. 37/ 2014 loron 17 fulan-Dezembru.

Ministru Justisa Ivo Valente hateten, asina kontratu-promesa ho Heineken hanesan komprimisu Governu nian atu fasilita investimentu sira iha ita-nia rai, ita hatene katak, ho investimentu mak fó biban kampu traballu ba ita-nia ema sira, sira mai aprezenta ona númeru traballadór ba timor-oan sira mak sei servisu, katak sira, kompañia Heineken Timor sei emprega ema liu rihun-ida.

“Tanba-ne’e, iha loron 29 fulan-Juñu 2015, Ministériu Justisa sei halo serimónia asina kontratu arendamentu rai nian ba kompañia Heineken Timor ho medida rai hamutuk 50,000 metru-kuadradu, rai ne’e propriedade estadu nian ne’ebé mak lokalizadu iha Aldeia Sukaer Laran, Suku Hera, Postu Administrativu Cristo-Rei, Munisípiu Dili,” aumenta Ministru Justisa.