DILI – Sesta-Feira, loron 05 fulan-Juñu 2015, Ministru Justisa Ivo Valente simu Premiu Kondekorasaun ba nia-dezempeñu servisu iha dezenvolvimentu instituisaun prokuradoria hodi haforsa setór justisa iha Timor-Leste.

Premiu Kondekorasaun ba Ministru Justisa Ivo Valente entrega iha momentu aniversáriu Prokuradoria Jerál Repúblika nian ba dala XV iha Salaun Ministériu Negósiu Estranjeiru no Kooperasaun (MNEC), Dili.

S.E. Presidente-Repúblika Taur Matan Ruak iha ninia diskursu hateten, Ministériu Públiku kombate krime, defende legalidade demokrátika no promove komprimentu ba lei, ho objetividade, izensaun no iha obediénsia ba diretiva no orden sira-ne’ebé previstu iha lei, nune’e nasaun presiza Ministériu Públiku iha munisípiu sira hotu.

Sentru Formasaun Jurídika iha fulan ida-ne’e halo atividade durante tinan 13 nia laran. Ne’e nu’udar momentu loloos atu halo avaliasaun sistemátika ida ba servisu ne’ebé hala’o tiha ona no planea dezenvolvimentu atividade sira iha instituisaun importante Justisa nian ida-ne’e. Espesialmente, ha’u apela señor Ministru Justisa no governu atu lansa avaliasaun objetiva ida ba Sentru Formasaun Jurídika nia rezultadu sira.

Konkluzaun sira avaliasaun nian tenke fó-roman ba planeamentu no tulun hodi renova atividade formasaun jurídika, iha tempu badak no médiu. Nasaun ne’e iha kuadru sira-ne’ebé kompetente no altamente kualifikadu atu hala’o avaliasaun ida-ne’e, hodi deteta pontu forte sira no hala’o korresaun ba pontu fraku sira; hatutan Presidente Taur Matan Ruak hodi espressa ninia pontu-de-vista ba dezenvolvimentu Sentru Formasaun Juríidika ne’ebé la’o dadaun.

“Señor Ivo Valente, atual Ministru Justisa hanesan Eis Adjuntu Prokuradór hosi 2006 to’o 2009 ne’ebé hatene liu situasaun prokuradoria, presiza atu servisu maka’as liután hodi hadia setór Justisa iha Timor-Leste”, enkoraja Presidente-Repúblika antes entrega Premiu Kondekorasaun.