DILI – Sesta-Feira, loron 19 fulan-Juñu 2015, Ministru Justisa Ivo Valente halo reuniaun ho USAID Timor-Leste (Counterpart International – Ba Distrito) ne’ebé lidera hosi Xéfi Ekipa USAID nia projetu Ba Distrito, Ms. Carolyn Tanner.

Objetivu hosi reuniaun ne’e, parte-rua koalia kona-ba posibilidade kooperasaun servisu (nota-intendimentu) entre USAID ho Ministériu Justisa.

Ministru Justisa Ivo Valente rekoñese katak, servisu hamutuk iha ámbitu aliñadu programa iha setór justisa nian importante tebes, Governu kompremete atu halo esforsu hotu-hotu hodi háforsa setór justisa, nune’e mós nakloke ba apoiu hosi doadór sira iha Timor-Leste.

Ha’u hasoru malu ona ho Sra. Embaixadora Estadus Unidus iha Timor-Leste no ami koalia mós kona-ba posibilidade apoiu ba Polísia Sientífika ba Investigasaun Kriminál Timor-Leste (PCIC) atu “oinsá” oferese formasaun, liu-liu iha área tékniku laboratóriu nian, espera, ita bele hametin liután lasu kooperasaun ne’e; hateten Ministru Justisa Ivo Valente.

USAID Timor-Leste Carolyn Tanner esplika ba Ministru Justisa kona-ba posibilidade apoiu hirak mak hanesan; (1) Levantamentu no analize ba kampaña, edukasaun no konsiensializasaun jurídika durante ne’e iha postu administrativu sira, (2) Apoiu ba assessória judisiária no lejislasaun, (3) Fornese asistensia legál ne’ebé responsive,

(4) Servisu hamutuk ho Sentru Formasaun Jurídiku hodi halo formasaun komplementáriu ba autor judisiáriu sira, (5) Halo peskiza, monitorizasaun no halibur dadus kona-ba Rezolusaun Disputa Alternativa (RDA), no (6) Halo monitorizasaun ba servisu tribunais nian.

Dadaun ne’e, USAID Timor-Leste submete ona dokumentu termu-referénsia, relatóriu peskiza iha setór justisa nian, buletim, etc. Ministru Justisa nune’e atu haforsa prosesu preparasaun ba nota-intendimentu, antes lori ba iha asina kooperasaun formál nian.

João Maupelo da Costa
Ofisiál Relasaun Públika
Ministériu Justisa