LOSPALOS – Sesta-Feira, loron 24 Jullu 2015, Ministru Justisa, Ivo Valente abertura emisaun Bilhete Identidade (BI) Timorense ne’ebé mak hala’o iha Edifísiu Direção Nacional dos Registos e do Notariado iha Lospalos, Munisípiu Lautem.

Ohin ita halo serimónia atu abertura tán emisaun BI iha Munisípiu Lautem, katak agora hamutuk munisípiu hitu ona (Dili, Covalima, Bobonaro, Oe-Cusse, Ermera, Baucau no Lautem) ne’ebé mak bele halo atendimentu públiku ba povu hodi hetan nia direitu ba identidade sivíl, Governu, liu hosi Ministériu Justisa sei halo esforsu hotu-hotu, maske neneik maibé beibeik hakat ba oin nafatin hodi kompleta emisaun BI iha munisípiu hotu-hotu; hateten Ministru Justisa, Ivo Valente wainhira hato’o ninia diskursu.

Abertura emissaun BI iha Munisípiu Lautem nu’udar passu importante ba implementasaun planu setór justisa nian hodi lori besik liután atendimentu públiku nian, liu-liu atu implementa Decreto-Lei Nú. 2/2014 kona-ba Regime Jurídico da Identificação Civil ba timor-oan sira iha nivél munisípiu, postu administrativu, suku no mós aldeia sira.

Ministru Justisa, Ivo Valente hateten mós katak, Bilhete Identidade bele halo ona iha Lospalos, ita-bo’ot sira lalika atu to’o ba iha Baucau ka Dili hodi hetan BI.

Bilhete Identidade bele hetan ona iha ne’e, tanba-ne’e, ha’u husu ba komunidade Lautem oan sira atu kumpri regras no pasiénsia tanba dalaruma atendimentu tenke la’o neneik, ita servisu ho liña internet hodi produz BI kuandu internet la’o diak presiza 5-10 minutus de’it, maibé kuandu internet la’o neneik bele liu 10 menutus kada ema ida. Tanba-ne’e, ha’u husu ita-bo’ot sira atu pasiénsia hein, no ha’u fiar Lautem oan sira sei hetan atendimentu di’ak hosi funsionáriu Rejistu Notariadu iha ne’e, sira sei servisu maka’as atende ita-bo’ot sira, sira sei fó prioridade ba populasaun kbiit laek sira no sira ne’ebé mak mai hosi fatin do’ok hodi nune’e lalika atu hein kleur liu.

“Ministériu Justisa liu hosi Diresaun Rejistu Notariadu sei iha atendimentu offline ba katuas no ferik sira, ba inabilidade sira ne’ebé defisil atu to’o mai iha Lospalos tanba fatór idade no fiziku, ba sira ne’ebé laiha kbiit fizikamente sei hetan ajuda hosi funsionáriu sira hodi to’o iha sira-nia fatin ida-idak hodi bele hetan BI, atendimentu offline ne’e hanesan meius umanu ne’ebé Ministériu Justisa tenke halo hodi nune’e populasaun hotu-hotu hetan nia direitu ba identifikasaun sivíl,” informa Ministru Justisa wainhira hakotu ninia diskursu.

Iha fatin hanesan, Diretora Nasionál Rejistu Notariadu (DNRN), Maria Fatima de Araújo hateten, abertura BI iha Lautem hanesan pasu foun ida tán ne’ebé DNRN halo, ho nune’e fasilita populasaun Lautem oan sira atu hetan BI, rekejitus hodi hetan BI mak tinan tenke liu 12, lori deklarasaun xéfi suku nian no Sertidaun RDTL. Nia aumenta liután, sistema baze-dadus ba Bilhete Identidade sei bele ajuda ministériu no instituisaun seluk hodi hala’o nia servisu, por exemplo, Ministériu Solidaredade Sosiál hodi bele identifika terseria idade no meius apoiu sira hosi sosiál, Ministériu Saúde, etc.

Partisipa iha serimónia abertura emisaun BI mak Eis Membru Parlamentu Nasionál no Koordenadór Antigos Combatentes no Veteranos Munisípiu Lautem, Renan Selak, Membru PN Deputada Albina Freitas, Diretór sira iha ámbitu Ministériu Justisa hosi Nasionál no Munisípiu Lautem, reprezentante Administradór Lautem, Ministériu Edukasaun munisípiu, Veteranu sira, Xéfi Suku sira, lider tradisionál, etc.

Auxiliadora Caetano Ximenes
Mídia Gabinete Ministru Justisa
Ministériu Justisa