DILI, CFJ – Sesta-Feira, loron 31 fulan-Jullu 2015, S.E. Ministru Justisa, Ivo Valente hala’o serimónia enseramentu ba Komisaun Organizadora Konferénsia Ministru Justisa Paiz sira Lingua Ofisiál Portuguesa (KPLOP) iha Centro Formação Jurídica (CFJ) Caicoli, Dili.

Iha serimónia enseramentu ne’e, Presidente Komisaun Organizadora hanesan mós Diretór Jerál CFJ, Marcelina Tilman hato’o ninia relatóriu no rezultadu Konferénsia Ministru Justisa Paiz sira Lingua Ofisiál Portuguesa, hahu hosi preparasaun, mobilizasaun rekursu, lojistíku, finansiamentu, protokolu, kooperasaun liña-ministériu no dezafiu sira ne’ebé mak komisaun organizadora hasoru durante konferénsia hala’o iha Salaun Konferénsia Ministériu Negósiu Estranjeiru no Kooperasaun (MNEK) Dili hosi loron 22-23 fulan-Juñu 2015.

Iha biban ida ne’e, Diretór-Jerál Ministériu Justisa, Henrique de Oliveira Ximenes hato’o ninia pontu-de-vista balun nu’udar evaluasaun ba prosesu simu bainaka Ministru Justisa sira membru Paiz Lingua Ofisiál Portuguesa. Aliénde fó-nia evaluasaun kritiku ba prosesu preparasaun komisaun nian no implementasaun konferénsia, Diretór Jerál ne’e mós fó-nia sujestaun balun nune’e iha futuru bele organiza eventu seluk ho di’ak liután, liu-liu hametin liña koordenasaun ho efikaz.

Ministru Justisa Ivo Valente iha ninia intervensaun hateten, Konferénsia Ministru Justisa sira Paiz Lingua Ofisiál Portuguesa rai hela impresaun di’ak ba ita-nia bainaka sira mak mai iha ne’e, sira koa’lia ho ha’u, por exemplo Sekretáriu Estadu Direitu Umanu no Justisa Portugal dehan mai ha’u katak, diferente tebes iha tinan 2002 wainhira nia mai iha Timor-Leste, aliénde iha mudansa bo’ot ba iha dezenvolvimentu infra-estrutura, estrada komesa kapa’as, uma bo’ot-bo’ot aumenta barak no hotel sira estandarte internasionál ona, nune’e mós nia dehan ita-nia protokulu bem-preparadu simu bainaka sira hosi rai liur.

Ha’u simu mós apresiasaun hosi Ministru Justisa Moçambique nian no sel-seluk tán, sira maioria agradese no kontente ho ita-nia laran luak wainhira simu sira iha ita-nia rai. Ho impresaun ne’e, ha’u Ivo Valente tenke orgullu ba ita-bo’ot sira-nia servisu maka’as, maske ita-bo’ot sira tenke servisu iha loron kalan, la-sente kolen, servisu iha loron sabadu no iha domingu ne’ebé mak tuir lolo’os tenke passa tempu ho ita-bo’ot sira-nia familia; aumenta Ministru Justisa.

Ho servisu maka’as ekipa ne’e, Ministru Justisa fó-nia obrigadu no apresiasaun bo’ot tebes ba Presidente Komisaun Organizadora Marcelina Tilman, Diretór Jerál Ministériu Justisa Henrique de Oliveira Ximenes, Pontu Fokál Ministériu Justisa ba CPLP Francisco Carceres, Diretór Nasionál Terras Propriedade Romão Guterres, Diretór Nasionál Prizaun no Reinsersaun Sosiál Helder Belo, Diretór Nasionál Administrasaun no Finansas Crisogno da Costa Neto, Assesór Internasionál sira, Antonio Verdial de Sousa, institusaun sira ne’ebé mak fó apoiu, kompania balun, inklui Timor Telecom no sel-seluk tán.

“Ha’u laiha buat ida atu fó ba ita-bo’ot sira ida-idak, ha’u pesoál, Ivo Valente só fó ha’u-nia apresiasaun bo’ot tebes no ha’u-nia orgullu tanba hamutuk ho ita-bo’ot sira iha Ministériu Justisa ne’e, kuandu ita konsege deteta frakeza balun, ne’e di’ak hodi hadia no halo di’ak liután iha futuru, maibé buat balun ne’ebé mak sei falta labele hálakon ita-nia orgullu ba susesu ne’ebé mak ita atinzi ona, orgullu tanba hanesan uma-nain primeiru vez ba konferénsia bo’ot ida ne’ebé mak Ministériu Justisa konsege organiza ho di’ak tebes;” hateten ho orgullu Ministru Justisa, Ivo Valente ba Komisaun Organizadora KPLOP iha Aula Konférensia Centro Formação Jurídika Caicoli.

Iha serimónia enseramentu Komisaun Organizadora KPLOP ne’e, Ivo Valente mós fahe Sertifikadu Apresiasaun nu’udar prezente no apresiasaun hosi Ministru Justisa ba membru Komisaun Organizadora sira-hotu. Ho sertifikadu apresiasaun Komisaun Organizadora Konferénsia Ministru Justisa Paiz sira Lingua Ofisiál Portuguesa (KPLOP) iha Dili ofisialmente remata ona iha loron 31 fulan Jullu tinan 2015.