DILI – Segunda-Feira, loron 03 fulan-Agusto 2015, Ministru Justisa Ivo Valente prezide reuniaun kona-ba aprezentasaun esbosu Planu Asaun Anuál (PAA) Ministériu Justisa tinan sivíl 2016 iha Centro Formação Jurídika (CFJ) Caicoli, Dili.

Reuniaun aprezentasaun esbosu PAA 2016 ne’e involve diresaun sira-hotu no kargu xéfia sira; partisipa Defensór Públiku Jerál Dr. Sergio Hornai, Diresaun Jerál Ministériu Justisa, Diretora Jerál CFJ Marcelina Tilman, Inspetór-Jerál Lucas Antonio da Costa, Sub-Inspetór Jaime Maia, Diretór Nasionál sira no Xéfi Departementu sira, reprezentante hosi Polísia Sientifíka Investigasaun Kriminál (PSIK) no mós Xéfe Gabinete Ministru Justisa Evangelino Belo no Xéfi Gabinete Sekretáriu Estadu Terras Propriedades Marciano Barreto.

Ministru Justisa, Ivo Valente iha nia-intervensaun abertura hateten, ha’u apresia tebes ho ita-bo’ot sira-hotu nia esforsu tomak durante ne’e, sem ha’u-nia prezensa, ita-bo’ot sira mai ona ho esbosu ida ne’ebé di’ak tebes, no ohin hahu ona ba aprezentasaun nune’e ita bele finaliza no submete ba iha Ministériu Finansas tuir tempu desididu.

Tanba-ne’e, planu tenke reflete ita-nia kapasidade ezekusaun, asegura nia kualidade, esforsu tomak atu nune’e bele atinzi meta ne’ebé planeadu no planu hosi diresaun hotu-hotu tenke bazeia ba iha Planu Estratéjiku Setór Justisa 2011-2030. Ho nune’e, ha’u husu atu hare’e hikas planu 2016 nian, sá prioridade mak importante liu, tenke define prioridades ne’ebé nia impaktu fó benefisiu ba ema barak nia moris, tenke rona mós lamentasões hosi povu hodi nune’e ita bele halo programa ne’ebé efeitivu liután; aumenta Ministru Justisa Ivo Valente hodi diriji reuniaun PAA 2016.

Inspetór Jerál Ministériu Justisa no Diresaun Nasionál Administrasaun no Finansas (DNAF) informa katak, esbosu PAA 2016 ne’e rezultadu hosi ezersisiu ne’ebé halo ona kada diresaun ida-idak iha hirak liubá, reflete ona kapasidade institusionál, rekursu umanus no mós lojistíku ne’ebé mak iha dadaun.

Diretór Nasionál DNAF, Crisogno Neto informa, Ministériu Justisa simu envelópe fiskál 2016 nian hamutuk $18,917,310.00 ($18,9 milhões dolár), kompara ho orsamentu tinan ne’e (2015) envelope fiskál tinan oin tu’un ka hetán redusaun maka’as. Totál envelópe fiskál ne’e aloka ba iha kategoria tolu de’it mak hanesan; (1) Saláriu no vensimentu hamutuk $4,188, 500.00, (2) Bens servisu $14,278,810.00, dan (3) Kapitál menór hamutuk $450,000.00.

Depois-de apresiasaun, Ministru Justisa prezide aprezentasaun ne’ebé mak prepara ona hosi Ekipa Diresaun Planeamentu Gabinete Diresaun Jerál Ministériu Justisa nian. Aprezentasaun ne’e nu’udar rezultadu elaborasaun hosi dadus no diskusaun klean ba PAA 2016 kada diresaun ida-idak nian ne’ebé mak Diretór Jerál Ministériu Justisa organiza ho maratóna kuaze besik fulan-ida nia laran.

Aprezentasaun halo ba kada diresaun ida-idak, no Ministru Justisa husu ba diresaun ida-idak hodi fó esplikasaun no halo justifikasaun, inklui halo ajustamentu no

harmonizasaun ba despeza sira ne’ebé ultra-passa tiha tabela alokasaun ne’ebé propoin ona ba iha diresaun ida-idak.

Tuir planu esbosu PAA 2016 Ministériu Justisa nian ne’e sei aprezenta mós ba iha S.E. Ministru Estadu Koordenadór Administrasaun no Justisa Dionisio Babo Soares, P.hD. iha loron 10 fulan-Agusto 2015 antes submete ba Ministériu Finansas iha loron 14 fulan-Agusto 2015.

Auxiliadora Caetano Ximenes
Mídia Gabinete Ministru Justisa
Ministériu Justisa