MANATUTO – Sesta-Feira, loron 14 fulan-Agusto 2015, S.E. Ministru Justisa, Ivo Valente, hala’o serimónia Tomada de Posse ba direjente ofisiais foun Ministériu Justisa nian iha área leste (Lautem, Baucau, Viqueque no Manatuto). Tomada de Posse ne’e ba Diretór Konservatóriu ba munisípiu hat iha área leste, Diretór Terras Propriedade ba munisípiu hat, Xéfi Departementu ba DNDHC (direitus umanus) no DNPRS (prizaun), Xéfi Departementu Administrasaun no Finansas Defensoria Públiku iha ámbitu Ministériu Justisa ne’ebé lokalizadu iha Edifísiu Rejistu Notáriadu Munisípiu Manututo.

Ministru Justisa, Ivo Valente iha ninia intervensaun ba direjente foun sira hateten, “ita-bót sira nomeia tuir rekizitus Lei Funsaun Públiku nian hodi assume kargu xéfia no diresaun, nune’e mós tanba ita-bót sira-nia esperiénsia no méritu ka matenek. Tanba-ne’e, ha’u husu atu foti kna’ar ne’e ho responsabilidade no dedikasaun ás atu hala’o servisu no esforsu maka’as liután nune’e responde povu ninia espetasaun ba servisu setór justisa nian.”

Ita-nia esforsu durante ne’e sei do’ok hosi espetasaun povu nian, tanba-ne’e,

ita-bót sira wainhira hala’o kna’ar tenke koñese didi’ak mós imi-nia dezafiu no obstakúlu atu nune’e ita bele buka solusaun oioin hodi ultra-passa, ha’u enkoraza ita-bót sira atu ho prinsípiu serve nafatin ita-nia povu, kuandu iha obstakúlu ba fasilidade no apoiu rekursu umanu, por-ezemplu iha Munisípiu Viqueque, ita sei buka hodi rezolve neneik atu nune’e bele fasilita di’ak liután atendimentu ba públiku; enkoraza Ministru Justisa.

Hodi termina ninia diskursu ofisiál, Ministru Justisa apela ba ofisiais sira ne’ebé simu-posse katak,

ita-bót sira wainhira ezerse ita-nia funsaun sei la ses hosi dezafiu no difikuladade oin-oin, tanba-ne’e, ha’u hateten ba imi-hotu tenke halakon maneira individualizmu no egoizmu, tenke iha pasiénsia hodi buka buka no promove nafatin servisu iha espíritu ekipa nian no ho pensamentu nu’udar liman-ain Governu no makina Estadu ne’ebé mak sai esperansa povu hodi sente no hetan dezenvolvimentu justisa nian.

Parabéns ba ita-bót sira hotu, parabéns ba imi-nia familia, ha’u hato’o mós ha’u-nia deseju susesu ba ita-bót sira hotu; hakotu Ministru Justisa, Ivo Valente.

Iha biban ne’e, Diretór Jerál Ministériu Justisa, Henrique de Oliveira Ximenes hato’o ninia relatóriu ba Ministru Justisa kona-ba prosesu tomada de posse ba direjente Ministériu Justisa munisípiu nian ne’ebé mak hahu ona hala’o iha munisípiu sira atu nune’e autoridade munisípiu sira bele foti fatin. Aliénde momentu atu introduz ofisiais justisa nian iha munisípiu ba autoridade munisípiu sira no sira bele sai sasin mós ba komprimissu ne’ebé mak halo hosi emposadu sira.

Diretór Jerál Ministériu Justisa hatutan, nia agredese ba prezensa Señor Ministru iha momentu importante ba tomada de posse ne’ebé mak primeira vez hala’o hosi Ministériu Justisa iha nivél munisípiu, ohin, hahu dadaun ona iha Munisípiu Manatuto hodi fó posse ba direjente Ministériu Justisa nian mak lokalizadu iha parte leste nian, tuir mai sei iha parte rai-klaran foti fatin iha Munisípiu Manufahi no parte oeste sei lokalizadu iha Munisípiu Ermera.

Serimónia Tomada de Posse ne’e partisipa hosi Defensór Públiku Jerál Dr. Sergio Hornai, Diretór Jerál Ministériu Justisa Dr. Henrique de Oliveira Ximenes, Amo Paróko Laleia Frei Maximilian Kim Song, Inspetór Jerál Dr. Lucas da Costa, Secretáriu Munisípiu Manatuto Gaspar Nuno Gusmão, Presidente Asosiasaun Veteranus no Antigu Kombatantes Candido Soares, Xéfe Gabinete Ministru Justisa Dr. Evangelino Belo no Xéfi Gabinete Sekretáriu Estadu Terras Propriedades Dr. Marciano Barreto, Diretór Nasionál sira, Diretór Munisípiu no Xéfi Departementu, autoridade lokál no mós familia emposadu sira, etc.

Serimónia Tomada de Posse ba direjente ofisiais foun Ministériu Justisa iha área leste markadu ho ku’a kék no loke champanhe, depois kontinua ho foto hamutuk ho emposadu sira no antes fahe malu sei han meudia hamutuk.

Solange Pires
Mídia Gabinete Ministru Justisa
Ministériu Justisa